Smnewstl.com 26-09-2034 (Nova Iorke) – Ministru Negósius Estranjeirus no Kooperasaun, Bendito dos Santos Freitas kinta-feira ne’e, depozita formalmente Timor-Leste nia Instrumentu ratifikasaun ba akordu tuir konvensaun Nasoins Unidas kona-ba Le Tasi nian ba Organizasaun Nasoins Unidas (ONU).
Dokumentu refere simu direta hosi Sub-Sekretáriu-Jerál Interinu ba Asuntu Jurídiku no Konsellu Jurídiku ONU nian, Stephen D. Mathias, iha okazisaun sessaun Assembleia Jerál Nasoins Unidas ba dala-79, iha Nova Iorke.
“Depois de semana kotuk Parlamentu Nasionál Timor-Leste ratifika dokumentu ligadu ba altu mar (BBNJ), ohin ofisialmente Ministru Negósius Estranjeirus no Kooperasaun Repúblika Demokrátika Timor-Leste, Bendito Freitas, depozita formalmente dokumentu ne’e ba Nasoins Unidas,” informa Ministru Bendito hafoin entrea dokuementu refere.
Parlamentu Nasionál Timor-Leste, halo ratifikasaun ba akordu refere iha loron 17 fulan-setembru liu-bá, nu’udar instrumentu internasionál ida tuir kovensaun Nasoins Unidas kona-ba Lei Tasi nian no mós kona-ba Konvervasaun no Sustentável Uza Diversidade Biolójika Tasi nian hosi área ne’ebé haleu Jurisdikasaun Nasonál (ka akordu Biodiversity Beyond National Jurisdiction-BBNJ) durante tratadu ONU 2024.
Timor-Leste nia ratifikasaun ba Akordu BBNJ nu’udar realizasaun signifikativa ida iha konservasaun no jestaun sustentável ba rekursu tasi nian hasoru mudansa klimátika no degradasaun tasi nian. Ida-ne’e mós hanesan ónra ida ba Timor-Leste atu hamutuk ho nasaun sira ne’ebé ratifika ona akordu refere no husu ba sira seluk ne’ebé seidauk atu bele ratifika.
Timor-Leste kompromete atu kaer metin prinsípiu sira hosi Akordu BBNJ, promove kolaborasaun sientífika, no defende prátika sustentável sira hodi salvaguarda biodiversidade tasi nian. (*/Smnews)
Komentariu