Smnewstl.com — Bazeia ba nota delegasaun husi Ministru Negósiu Estranjeiru Kooperasaun, Bendito dos santos Freitas ba Ministru Administrasaun Estatal,Tomás do Rosário Cabral,hodi reprezenta MNEC iha ámbitu Simeira Komunidade País Lian Portugues nian (CPLP) ho razaun importante balu tuir karta ho númeru referénsia 70/MNEC/VII/2025, loron 4 Jullu 2025.Ho oportunidade ida ne’e Ministru Administrasaun Estatal Tomás do Rosário Cabral hato’o pedidu sorumutu kortezia ho omólogu Ministru Defeza Nasionál Doutor Nuno Melo,ho númeru referénsia 321/M-MAE/VII/2025 no hetan aseitasaun ba markasaun reuniaun ne’ebé sorumutu refere akompaña mós husi Embaixadóra Timor-Leste nian iha Portugál, Señora Isabel Amaral Guterres no Xefe Gabinete, Benigno Humberto da Cruz.
Reuniaun ne’ebé mak realiza iha edifisiu Ministériu Defeza Nasionál, lokaliza iha Avenida Ilha Madeira, hodi aprezenta komitmentu Governu Timor-Leste nian kona-ba kooperasaun ba valorizasaun patrimónia arquivo militár Portuguesa nian iha Timor-Leste hodi kontinua reforsa lasu amizade entre nasaun rua, tuir komunikasaun ne’ebé mak hala’o ona durante ne’e, no konsidera katak dokumentus arquivo militár Portuguesa nian arquivadu iha Instituisaun Governu hanesan Arquivo Nasionál Timor-Leste (ANTL.IP), hanesan instituisaun administrasaun indireta husi Ministériu Administrasaun Estatal.
Konsidera ba esperiensia konsolida no rekuiñese kompetensia téknika husi entidade ligadu ho Ministériu Defeza Portugál iha salvaguarda no valorizasaun patrimónia arquivu militár hanesan oportunidade boot ba Timor-Leste ne’ebé konta ho apoia tékniku Portuguesa através husi inisiativa sira ne’ebé mak inklui interkámbiu spesialista, realizasaun formasaun no envia misaun téknika hodi hala’o observasaun iha terrenu hodi bele iha hanoin atu mellora liután sistema arquivo ne’ebé oras ne’e eziste iha ita nia Nasaun Timor-Leste, liu husi moderniza liután sistema refere, no bele implementa liu husi selebrasaun akordu kooperasaun espesifiku, hodi kontinua hametin lasu amizade no kooperasaun entre Timor-Leste no Portugál, prezerva memória istóriku komum no promove kuiñesimentu jerasaun atual no futuru oin mai.
Hafoin Ministru Administrasaun Estatal hato’o breve informasaun husi importansia reuniaun ida ne’e, ho laran ksolok Ministru Defeza Nasionál hato’o nia laran ksolok ba informasaun sira ne’ebé aprezenta husi nia omólogu Governante Timor-Leste kona-ba arquivo militár Portuguesa, no konkorda tebes ho pedidu ba selebra akordu kooperasaun entre Ministériu rua hodi apoia mellora sistema arquiva ne’ebé mak moderna, interkambiu husi ekipa téknika hodi observa sistema iha kada instituisaun relevante atu nune’e husi parte rua bele hetan benefísiu husi akordu kooperasaun ne’ebé mak sei selebra.
Reuniaun ne’ebé mak hala’o besik oras ida nia laran la’o ho amigavel no Governante sira iha vontade di’ak atu bele aselera realizasaun husi vizita ekipa tékniku iha terrenu hodi observa sistema dijitalizasaun arquivo Portuguesa atu bele mellora liután sistema arquivo Governu nian iha Timor-Leste no mós preparasaun esbosu akordu kooperasaun ida ne’e (*/Smnews)
Komentariu