Ministro Jose Agustinho Komfirma Projetu Fibra Ótika Iha Ona CNA, Sei Solusiona Problema Internet

Smnewstl.com 04-01-2022 (Dili) — Ministru Transporte Komunikasaun (MTK), José Agostinho da Silva informa, progressu kona-ba dada kabu submarinu husi Austrália no Indonézia mai Timor-Leste iha ona Komisaun Naisonál Aprovizionamentu (CNA) hodi loke konkursu públiku.

José Agostinho dehan, progressu projetu ligasaun kabu submarinu fibra ótika mai Timor-Leste ne’e, iha ona schedule, maibé iha tinan kotuk liu bá, prosesu atrazu fulan 5 nia laran no laiha rezultadu.

“Agora asaun hotu-hotu la’o iha on schedule iha hela prosesu aprovizionamentu iha CNA monitoriza diretamente husi Vise Primeiru-Ministru assuntu infraestrutura no ha’u rasik nu’udar Ministériu tutela, Ministru Finansas, ami haree lisuk assuntu ne’e,” dehan Ministru José Agostinho, hafoin remata enkontru ho PM Taur, iha rezidénsia Farol, Dili, Tersa ne’e.

José Agostinho dehan, governu halo esforsu atu finaliza no dada kabu submarinu fibra ótika mai Timor-Leste molok mandatu remata. Tuir nia, bainhira kabu submarinu fibra ótika mai maka sei bele fasilita di’ak liután iha eleisaun Prezidensiál no Parlamentár.

“Ita-nia esforsu, sé bele ita finaliza antes mandatu oitavu governu remata, esforsu di’ak liután karik remata antes bele fasilita ita-nia festa demokrasia eleisaun prezidensiál, eleisaun parlamentár sei tinan, mais sé karik ita esforsu to’o iha tempu ne’ebá buat hotu bele la’o di’ak bele fasilita ita,” dehan José Agostinho.

Intensaun husi ligasaun kabu submarinu fibra ótika ne’e, mak atu rezolve problema rede internet ne’ebé sai preukupasaun bá públiku tanba, rede internet lentu ho kustu ne’ebé karun tebes.

“Kualidade internet ne’e lentu depois ho kustu ne’ebé karun. Ha’u hanoin iha tempu ne’ebá ita bele responde ona ida-ne’e,” subliña nia.

Governu mós prepara ona rekursu umanu, liu-liu tékniku sira, bainhira kabu submarinu fibra ótika ne’e to’o Timor-Leste, sei fó mós oportunidade bá timor-oan sira-ne’e hodi halo servisu.(ant)