Ministro Agustinho Detekta Iha Indisius Uza Ró Berlin Ramelau Bá Objetu Negósiu

Smnewstl.com 04-01-2022 (Dili) — Ministru Transporte Komunikasaun (MTK), José Agostinho da Silva detekta iha indísiu forte ema balun tenta uza ró Berlin Ramelau bá objetu negósiu hodi hatama família bá servisu iha ró refere.

José Agostinho afirma, hanesan Ministru tutela, sempre halo kontrolu másimu iha tempu kalan no loron, atu evita ema labele uza ró Berlin Ramelau hanesan objetu bá negósiu, tanba ró refere sosa ho osan estadu nian.

“Nu’udar Ministru ha’u asegura, ha’u lakohi para ró ahi foun ida-ne’e sai fali objetivu business bá ema balun, ha’u pro-ativu kontrola, kalan mós ha’u monitor ró ne’e ninia paradeiru iha ne’ebé, oinsá atendimentu bá ita-nia crew sira iha ró laran ne’e ha’u kontrula,” dehan José Agostinho, hafoin remata enkontru ho PM Taur iha Farol, Dili, Tersa-feira ne’e.

Executivo ne’e esklarese, Indísius ne’ebé deteta  liu-liu mak prosesu rekrutamentu bá tripulante ne’ebé bolu malu de’it sem liu husi prosesu teste no prosedimentu legál ne’ebé rekrutamentu nian.

“Ita tenki kontrola ho di’ak, tanba iha indísius balun, maka ha’u lakoi temi iha ne’e, pur-ezemplu liga bá rekrutamentu crew ninian, iha crew ita-nia timoroan sira kumpre prosedimentu legál ne’ebé iha, iha mós balun ne’ebé mak iha indísius atu bolu de’it, mais ha’u detekta ha’u impede kedas, tanba buat ida bolu de’it ne’e, ita bele bolu ita-nia família,” informa nia.

Agustinho afirma tan katak, nafatin asegura ró Berlin Ramelau nu’udar fasilidade estadu nian, nune’e bele fasilita movimentu transporte marítima bá populasaun Ataúro no Oe-cusse.

Tanba durante ne’e bele haree, operasaun ró dala hira nia fó fali income bá kofre estadu ne’e hira.? Maske prezensa ró ne’e ho natureza fasilita populasaun Oe-cusse no Ataúro.

“Ha’u kestiona mak ninia maneira ida tama mai ne’e, sé tama mai tuir regra prontu, ita hakarak ema ne’ebé iha kapasidade, kualidade par jere ita-nia sasán, maibé tenki tama tuir regra,” kestiona José Agostinho.

Entretantu, Governante bele relata, tripulante Timoroan na’in 10 resin ne’ebé servisu iha ró Berlin Ramelau ne’e, hahú familiár ona ho ekipamentu teknolojia modernu tuir padraun Europa no Ázia nian ne’ebé utiliza iha ró ne’e.

Ró Berlin Ramelau halo ona operasaun bá dala-4, hahú iha fulan Dezembru 2021, ho kapasidade tula pasajeiru 280, no kareta 15.(ant)