Smnewstl.com — Nu’udar parte ida husi vizita serbisu ofisiál ba iha Simeira CPLP haktuir karta ho númeru referensia 70/MNEC/VII/2025, loron 4 Jullu 2025, ne’ebe mak Ministro Administrasaun Estatal representa Ministru Negósiu Estranjeiru no Kooperasaun liu husi nota delegasaun reprezentasaun MNEC iha ámbitu Simeira Komunidade País Lian Portugues nian (CPLP) ho razaun importante balu.
Tamba ne’e husi biban ne’e Ministro Administrasaun Estatal,Tomás do Rosário Cabral aproveita oportunidade hodi hala’o reuniaun kortezia ho nia omólogu Ministru Prezidénsia Konsellu Ministru, Doutór António Leitão Amaro no Ministru Adjuntu Reforma Estadu, Doutór Gonsalo Mateus, ne’ebé mak akompaña mós husi Embaixadóra Timor-Leste nian iha Portugál, Señora, Isabel Amaral Guterresno Xefe Gabinete,Benigno Humberto da Cruz.
Reuniaun ne’ebé mak realiza iha edifisiu besik oras ida, Ministru Administrasaun Estatal aprezenta Governu Timor-Leste nian ne’ebé mak iha vontade firme atu realiza akordu kooperasaun ho Prezidénsia Konsellu Ministru Portugal ne’ebé mak sei foka liu ba organizasaun jestaun dokumentus (arquivo) tamba konsidera klasifikasaun arquivo dokumentos Governu nian ne’ebé aliserse esensial ba Administrasaun Públika ne’ebé mak efisiente, transparansia liu husi servisu administrasaun indireta ANTL.IP no moderna liu husi estabelesimentu balkaun úniko iha Timor-Leste ne’ebé mak kontinua iha progressu ba kontrusaun no utilizasaun sistema balkaun úniku no assistensia sira ne’ebé mak instala iha sistema ne’e rasik.
Asuntu pertinente ida ne’ebé mak diskute iha reuniaun ne’e mós sobre introdusaun lian Portugues iha servisu Administrasaun Publika hanesan parte ida atu mellora servisu funsionáriu públika sira iha Munisípiu antes hakat ba eleisaun ba Poder Lokál ne’ebé tuir planu sei realiza iha tinan 2027 liu husi kapasitasaun ba rekursu umanu.Reuniaun ida ne’e hetan resposta di’ak husi Ministru Prezidensia Konsellu Ministru no no Ministru Adjuntu Reforma Estadu Portugal nian, no iha komitmentu hodi organiza no koordena ho Ministériu no Instituisaun relevante sira hanesan AMA, Instituto Camões no INA, atu bele hahu diskute sobre akordu kooperasaun nia esbosu ne’ebé mak envia ona ba instituisaun relevante sira liu husi Embaixada Timor-Leste iha Portugal, hodi nune’e bele iha konkordansia ba malu liu husi akordu kooperasaun, no bele mós realiza asinatura no asaun tuir termu sira ne’ebé mak mensiona ona iha akordu kooperasaun ne’e rasik.
Reuniaun ne’ebé mak hala’o besik oras ida nia laran la’o ho amigavel tebes no Governante sira iha vontade di’ak atu bele aselera realizasaun ba asinatura akordu kooperasaun ida ne’e, ho nune’e bele implementa mós hanesan parte ida preparasaun prienxe rekezitus no mellora servisu administrasaun públika iha Munisípiu no Autoridade Administrativa Ataúro antes hakat ba eleisaun poder lokal(*/Smnews)
Komentariu