Ministrio Edukasaun Ho UNICEF Koalia Haforsa Koperasaun

Smnewstl. com – Ministra Edukasaun Dulce de Jesus Soares hala’o enkontru ho reprezentante husi UNICEF hodi ko’alia kona-ba oinsá fó kontinuidade ba programa ne’ebé mak apoiu ona ba Ministériu Edukasaun liu-liu iha area pré-eskolár no ensinu báziku inklui formasaun ba profesór/a sira, iha salaun VIP Ministériu Edukasaun, Vila-Verde.

Iha enkontru ne’e Ministra Edukasaun Dulce de Jesus Soares hateten, UNICEF Ministériu Edukasaun nia parseiru ba tinan naruk ona no apoiu sira ne’ebé iha foka liu ba área aprendizajen hodi bele garante kualidade edukasaun iha Timor-Leste.

“La iha buat foun ida, maibé kontinua atu reforsa ba servisu ne’ebé halo ona no buat di’ak ida mak tinan oin sei iha teste avaliasaun ida ba estudante sira ne’ebé mak iha ona klase lima (5) ne’ebé mak iha Sudoeste Asiátiku ne’e hotu no ba dala uluk Timor-Leste partisipa iha avaliasaun refere”, dehan Governante ne’e.

Iha fatin hanesan reprezentante UNICEF Mitsue Uemura hateten, pilotazen ba tinan ida ne’e sei halo ba eskola hamutuk rua nulu resin lima (25) no estudante hamutuk 1000 mil hodi halo teste ba tinan 2024 atu bele haree oinsá performasaun estudante sira nian liu-liu klase lima (5) ensinu báziku atu bele hasa’e kualidade edukasaun iha Timor-Leste.

“Programa ne’e foku de’it ba klase lima (5) ensinu báziku, tanba dala uluk ita halo investimentu sedu liu iha ensinu báziku ida ne’e ajuda liu atu ita bele halo intervensaun la’os de’it iha área edukasaun, maibé iha mós nutrisaun, saúde nomós área sira seluk”, dehan reprezentante UNICEF.(SMNews)