Ministra Edukasaun Prezide Sermónia Simu Posse Ba Líder Komunitària Hamutuk Na’in 7

Smnewstl. com– Ministra Edukasaun Dulce de Jesus Soares, prezide serimónia simu posse ba líder komunitáriu na’in hitu (7) ne’ebé foin lalais eleitu iha eleisaun liubá, iha Postu Administrativu Maliana, Munisípiu Bobonaru, hafoin remata tiha isár Bandeira RDTL kona-ba komemorasaun loron Proklamasaun Ukun Rasik-an nian ba dala 48, iha loron tersa-feira ne’e.

Iha diskursu ba simu posse nian, Ministra Edukasaun Dulce de Jesus Soares hateten, líder komunitáriu sira hatudu komprimísiu atu hatúr hikas fali prínsipiu hirak fundamentál ne’ebé sai hanesan rin ba rejime demokrátiku no ba objetivu hirak estratéjiku ne’ebé hatúr ona husi governu hodi promove dezenvolvimentu nasionál.

“Líder komunitáriu sira hotu importante atu mantein seguransa, unidade no servisu hamutuk ne’ebé mak di’ak tebe-tebes iha povu nia leet, mesmu ita infrenta dezafiu oin-oin, maibé oportunidade mós oin-oin ba ita”, dehan Ministra Edukasaun.

Governante ne’e mós insentiva líder komunitária sira atu haburas transparánsia, responsabilidade no simu membru sira hotu iha komunidade sira bainhira foti desizaun, nafatin partisipa ativu husi sidadaun sira mak sai forsa ne’ebé dudu ba oin sosiedade ida ne’ebé prósperu.

Enkuantu serimónia simu pose ne’e ba xefe suku hamutuk na’in hitu (7) iha suku hitu (7), Postu Administrativu Maliana mak hanesan, Suku Lahomea, Saburai, Raifun, Ritabou, Odomau, Tapo-Memo no Holsa.(SMNews)