Ministra Edukasaun Partsipa Iha Formasaun Ba Enumerador/a Sira Hamutuk Neen Nulu (60) Husi Munisipiu Hotu-hotu Inklui RAEOA

Smnewstl. com – Ministra Edukasaun Dulce de Jesus Soares partisipa iha formasaun ba enumeradór no enumeradora sira hamutuk na’in neen nulu (60) husi munisípiu hotu inklui RAEOA hodi hanorin sira oinsá halo levantamentu dadus kona-ba profesór no profesora sira idak-idak kada eskola. Formasaun ne’e hala’o iha Salaun JL-Vila, Fatuhada.

Iha formasaun ne’e Ministra Edukasaun Dulce de Jesus Soares hateten, Ministériu Edukasaun servisu hamutuk ho PHD nomós ONG nasionál BELUN hodi halo formasaun ba enumeradór no enumeradora sira hodi halo levantamentu dadus ba profesór no profesora sira husi nível ensinu pré-eskolár to’o ensinu sekundáriu jerál no tékniku vokasionál.

“Profesór no profesora sira ne’ebé atu halo levantamentu dadus hamutuk na’in rihun sanulu resin lima resin (15.000), husi informasaun ne’e hotu Ministériu Edukasaun hamutuk ho parseiru sira sei halo análiza ba dadus sira no husi ne’ebá mak identifika profesór no profesora sira koloka ona tuir nesesidade ka lae?, presiza halo rekrutamentu ka lae?, presiza profesór no profesora iha área kompeténsia saida? hodi bele rezolve problema ne’ebé mak durante ne’e la’o hela”, dehan Ministra Edukasaun.

Governante ne’e hatutan, dadus hatudu katak iha eskola balun profesór no profesora barak liu no eskola balun menus nomós iha eskola balun matéria ida iha profesór no profesora barak liu no balun la iha, tanba ne’e liuhusi levantementu ne’e atu bele koloka profesór no profesora sira tuir nesesidade ne’ebé mak iha.

Iha formasaun ne’e hetan partisipasaun husi Prezidente INFORDEPE, reprezentante Parseiru ba Dezenvolvimentu Humanu (PHD), NGO BELUN inklui asesór no asesora sira nomós dirijente husi Ministériu Edukasaun.(SMNews)