Ministériu Saúde Esforsu Kombate Surtu Dengue, Hamate Ona Ema 17

Smnewstl.com 26-01-2022 (Dili) — Ministru Prezidénsia Konsellu Ministru, Fidélis Magalhães konfirma, daduak ne’e, governu liu husi Ministériu Saúde halo esforsu makas hela atu kombate surtu dengue iha Timor-Leste.

Ministru Fidélis hatutan, episentru bá moras dengue ne’e iha Munisípiu Dili no Ermera, tan ne’e hodi hamosu ninia fatalidade no da’et makas bá labarik sira.

 

“Tanba nia episentru moras ne’e da’et ou moras ne’e ninia fatalidade iha Munisípiu boot rua, Dili ho Ermera. Entaun, ho preukupasaun ida-ne’e, governu halo hela esforsu lubuk ida, ita-nia Ministériu Saúde tau matan bá iha esforsu hotu governu nian bá kombate dengue ida-ne’e,” dehan Ministru Fidélis Magalhães, kuarta ne’e iha Palásiu Governu, hafoin remata enkontru konsellu ministru.

Tanba ne’e, Governante ne’e husu sidadaun hotu, atu intensifika liután kontrolu hodi hamoos fo’er iha uma ninin sira, tanba iha mundu labarik barak mak sai vítima bá surtu dengue refere.

“Tanba ne’e presiza intensifika liután esforsu sira parte saúde nian no mós ita hotu hanesan membru tomak sosiedade nian atu bele halo esforsu boot liu atu garante limpeza,” tenik nia.

Nia relata, medidas importante ne’ebé atu kontribui bá halakon moras dengue ne’e mak liu husi limpeza, tanba susuk mak sai ameasa boot liu bá ema atu hetan moras ne’e.

 Ne’eduni, Ministériu Saúde alem de tau atensaun bá surtu Covid-19, maibé Ministériu Saúde mós kontinua halo servisu atu hamate ka halakon moras dengue ne’e iha Timor-Leste.

Entretantu, tuir dadus ne’ebé relata husi Ministériu Saúde iha loron 25 fulan Janeiru 2022 katak, daduak ne’e rejista kazu dengue hamutuk 901, no hamate ona ema hamutuk na’in 17.(ant)