Ministériu Interiór Husu Kareta 200 Bá MF Apoio Seguransa Iha Eleisaun Prezidensiál

Smnewstl.com 11-02-2022 (Dili) — Ministériu Interiór haruka ona karta bá Ministériu Finansas (MF) atu husu apoiu kareta estadu besik 200 atu fó apoiu bá Polísia Naisonál Timor-Leste (PNTL) hodi asegura seguransa durante kampaña no eleisaun prezidensiál.

Vise-Ministru Interiór, António Armindo hateten, hela semana rua resin atu tama ona bá eleisaun prezidensiál, maibé to’o agora, Ministériu Interiór seoduak simu resposta ruma husi Ministériu Finansas liu husi Diresaun Jerál Jestaun Patrimóniu Estadu.

“Ministériu haruka ona karta bá Ministériu Finansas para atu husu karreta besik 200, husi karreta estadu ne’ebé mak governu foti ona bá, tau hamutuk iha pool, para ita bele hetan asesu ba iha karreta sira ne’e, ate agora ohin dia 11 ona ha’u seidauk rona notísia husi Ministériu Finansas liu-liu husi Patrimóniu Estadu karik sira bele disponível bele fornese karreta 200 ka lae? Se la’e sira tenke komunika sedu para, haree fali alterativu seluk,” dehan Vise MI, António Armindo, iha knár fatin, MI vila verde, Dili, sesta ne’e.

Governante ne’e dehan, bainhira Ministériu Finansas disponível duni kareta hirak ne’e, maka PNTL sei distribui veíkulu hirak ne’e balun bá postu Polísia sira, nune’e bele fó seguransa di’ak liután durante kampaña to’o eleisaun.

Iha parte seluk, Vise-Ministru Interiór ne’e akresenta, Ministériu Interiór liu husi Gabinete Vise-Ministru seiduak simu pedidu ruma husi Komisaun Naisonál Eleisoens (CNE) kona-ba koloka membru PNTL atu eskoltu kandidatu Prezidente Repúblika sira.

Maibé normalmente, bainhira pedidu sira hanesan ne’e haruka diretamente bá iha Gabinete Ministru Interiór, hafoin hasai despaixu bá Komandante Jerál PNTL atu ezekuta.(ant)