Ministériu Edukasaun Deside Aprova pedidu hari’i eskola iha Aldeia Labotete Suku Goulolo Postu Administrativu Cailaco

Smnewstl. Com – Ministeriu Edukasaun, husi Diretór Nasionál Infraestrutura Helio Lopes, Administradór Postu Administrativu Cailaco Alfredo Metadao hala’o vizita ba estudante sira iha Aldeia Iabotete Suku Goulolo hodi haree direta situasaun ne’ebé labarik sira infrenta iha baze.

Ministra Edukasaun Dulce de Jesus Soares hateten, disidi hamutuk ona ho Administradór Postu Administrativu Cailaco no Autoridade Lokal sira, hodi halo eskola ida iha aldeia Labotete, nune’e bele fasilita labarik sira bele asesu ba eskola iha sira nia aldeia rasik.

“Diretór Infrastrutura sei to’o ba tenki halo dezeñu, tenki mai haree fatin no ita hein katak se bele iha anu letivu foun sira pelumenus iha fatin-oan ida para sira komesa sira nia prosesu aprendizajen”, dehan Ministra Edukasaun.

Governante ne’e hatutan, karik konstrusaun tinan oin seidauk remata, sei koordena ho Xefe Suku atu iha fatin ruma ne’ebé bele uza no Ministériu Edukasaun selu ema hodi ajuda estudante sira aprende dadauk literasia ho numerasia hodi hein konstrusaun remata.

Hafoin remata tiha diskusaun ho komunidade sira, Ministra Edukasaun Dulce de Jesus Soares hamutuk ho Diretór Nasionál Infraestrtuta Helio Lopes, Administradór Postu Administrativu Cailaco, Autoridade Lokál inklui komunidade tomak Aldeia Ilatbote ba haree kedas fatin ne’ebé atu harii edifísiu eskola foun ba estudante sira.

Estudante sira iha Aldeia Ilatbote, Suku Goulolo hamutuk 78 ne’ebé ho tinan tolu to’o sia no entre sira, na’in nen de’it mak ba asesu eskola iha Poetete ho distánsia kilómetru rua tuir informasaun husi komunidade.(smnews)