Smnewstl.com (Dili) — Ministériu 4 asina memorandu entendimentu hodi establese kooperasaun servisu atu fasilita estudante finalista ensinu sekundáriu jerál no tékniku vokasionál hodi asesu engressu bá ensinu superiór públiku Universidade Nasionál Timor Lorosa’e (UNTL) ho Instutu Politékniku Betanu (IPB) tinan letivu 2022.
Ministériu 4 ne’e kompostu husi Ministériu Ensinu Superiór, Siénsia no Kultura (MESSK), Ministériu Solidariedade Sosiál no Inkluzaun (MSSI), Ministériu Administrasaun Estatal (MAE) no Ministériu Assuntu Kombatentes Libertasaun Nasionál (MAKLN).
Ministru MESSK, Longuinhos dos Santos esplika, objetivu prinsipál husi memorandu entendimentu ne’e mak atu fasilita estudante finalista sira husi ensinu sekundáriu jerál no ensinu sekundáriu tékniku vokasionál, inklui rejime espesiál bá finalista ne’ebé remata ona ensinu sekundáriu iha tinan 4 liu bá atu bele asesu bá UNTL ho IPB.
“Prosesu asesu engressu ida-ne’e iha rejime rua, ne’ebé mak rejime jerál no rejime espesiál, rejime jerál ne’e foka liu bá finalista husi ensinu sekundaria jerál no mós tékniku vokasionál, no mós rejime espesiál bá oportunidade ne’e bá estudante finalista ne’ebé maka akaba tiha ona iha tinan 4 kotuk liu bá fó oportunidade bá sira,” dehan Ministru Longuinhos dos Santos, kinta (19/08/21) hafoin remata asinatura iha salaun MSSI Kaikoli, Dili.
Memorandu entendimentu ne’e, iha mós rejime espesiál bá veteranus nia oan sira, rejime espesiál hakbiit bá ema vulnerável sira, rejime espesiál bá ema ho difisiensia inklui mós membru PNTL no F-FDTL no seluk tan.
Maibé, rejime espesiál ne’e hamutuk modalidade 16, tanba ne’e, liu husi asinatura ne’e, sei halo mudansa rua liu-liu iha rejime jerál ne’ebé fahe bá sub-rejime jerál, ensinu sekundáriu jerál no sub-rejime jerál bá tékniku vokasionál.
“Ninia rajaun fundamentu ita fahe bá rua, tanba tinan-tinan ita sempre hasoru difikuldade kuandu ita atu identifika estudante sira mais mellór, tanba ensinu sekundáriu jerál ho ninia disiplina ne’ebé mak ho kuantidade makas 6, tékniku 4 de’it kuandu partisipa iha izame nasionál, sira-nia valór ne’e kuandu ita haree mellór kualifikasaun ne’e la to’o ensinu sekundáriu jerál, tanba ne’e mak rejime jerál ne’e ita fahe bá rua,” esplika nia.
Sorin seluk, Vise Primeira-Ministra no MSSI, Armanda Berta dos Santos fundamenta, akórdu ida-ne’e, atu fasilita kbiit laek nia oan sira no mós ema ho difisiensia sira hodi bele asesu bá instituisaun ensinu superiór públiku UNTL no IPB.
“Akórdu ida-ne’e hodi haree bá iha hakbit bá ema kbiit laek nia oan sira no mós bá difisiente, atu nune’e sira mós bele asesu bá iha universidade, tanba ne’e mak ita halo akórdu ho MESSK hodi bele tau matan bá ita-nia ema sira-ne’ebé mak kbiit laek no mós bá ema difisiensia,” dehan Vise PM no MSSI, Armanda Berta.
Armanda Berta hatutan, tinan kotuk, rejime espesiál ne’e la integra mós ema ho difisiensia, tanba ne’e iha tinan letivu 2022, atribui mós oportunidade ne’e bá ema ho difisiensia sira.
“Iha tinan uluk ita mós hamutuk halo bá ema kbiit laek de’it, entaun tinan ida-ne’e atu bele haree bá 2022 nian, ita aumenta tan bá ema ho difisiensia no mós bá sira,” tenik nia.
Enkuandu, totál númeru husi rejime espesiál hakbiit ho ema ho difisiensia ne’e sei hein kuota ne’ebé sei aprezenta husi UNTL ho IPB, nune’e bele iha númeru serteza hira mak sei asesu bá ensinu superiór públiku rua-ne’e.(ant)
Komentariu