Ministério Edukasaun ho Enkaregada Negócio Embaixada Austrália Koalia Koperasaun Iha Seitor Edukasaun

Smnewstl.com – Ministra Edukasaun Dulce de Jesus Soares ho Enkaregada Negosiu Embaxada Austrália iha Timor Leste Sra. Caitlin Wilson hasoru malu lokraik ne’e hodi ko’alia kona-ba kooperasaun servisu liu-liu iha setór edukasaun, iha salaun VIP Ministériu Edukasaun, Vila-Verde.

Tuir komunikadu ne’ebe Smnews asesu komfirma, enkontru ho Enkaregada Negosiu Austrália Embaixada Austrália iha Timor-Leste ne’e atu haree fila-fali kona-ba programa sira ne’ebé mak durante ne’e fó apoiu ba Ministériu Edukasaun.

“Servisu kooperasaun ne’e naran ALMA hanesan programa apoio lideransa husi mentoria no aprendizagem no hahú kedas iha tinan 2016 no kontinu

’o agora no iha mós programa ida ho naran Edukasaun Inkluzivu, Edukasaun Multi Lingua to’o agora nomós ko’alia tan karik posivél Ministériu Edukasaun identifika tan programa atu bele hetan tan apoiu husi governu Austrália”, dehan Ministra Edukasaun.

Governante ne’e hatutan, Ministra Edukasaun sei hamutuk ho Enkaregada Negosiu Embaixada Austrália ba vijita eskola sira hodi haree diretamente programa ne’ebé mak la’o ona no iha posibilidade sei halo estensaun ba eskola sira seluk.

“Programa ne’e kapas tebes, tanba bele fó apoiu ba implementasaun kuríkulu halo jestaun ba sala aula nomós formasaun ba lideransa eskola nian hanesan Diretór/a eskola, Adjuntu eskola no Gabinete Apoiu Tékniku sira”, dehan Ministra Edukasaun.

Ministra Edukasaun hatutan, iha tempu badak sei enkontru hamutuk ho ajénsia sira hodi haree fila-fali karik presiza atu hadi’a buat ruma atu bele hasa’e di’ak liu tan kualidade edukasaun iha Timor-Leste. (Smnews)