MI Sei Sosa Kareta 26 Bá Polísia Eskuádra Hodi Apoio Seguransa ba Eleisaun

Smnewstl.com 10-11-21 (Dili) – Ministériu Interiór prevé ona orsamentu iha Orsamentu Jerál Estadu (OJE) 2022 atu sosa kareta hamutuk 26 hodi ba apoiu Polísia eskuádra sira ne’ebé laiha transporte atu hala’o servisu.

Vise-Ministru Interiór, António Armindo informa, OJE 2022 ne’ebé aloka bá Polísia Nasionál Timor-Leste (PNTL) kuaze milliaun $ 32, nune’e bele apoio halo preparasaun hodi fó seguransa bá eleisaun prezidensiál ne’ebé sei akontese iha tinan oin 2022.

Antonio sublinha, planu Ministerio Interior hakarak sosa kareta hamutuk 39 bá eskuádra Polísia 39, no kada eskuádra sei hetan kareta ida, maibé tetu OJE ne’ebé aloka bá Ministériu ki’ik tebs, tan ne’e labele atu sosa bá eskuádra hotu.

“Ha’u bá vizita tiha ona sira-nia eskuádra, sira kareta laiha duni, tanba ida-ne’e mak ita tau osan bá tinan oin sosa kareta oituan, ita hanoin katak, atu sosa dala ida par 39 eskuádras ne’ebé laiha kareta ne’e ita fó dala ida iha tinan oin, maibé, tanba ita-nia tetu ne’e ki’ik, entaun ita só hatama de’it mak 25,26 tinan oin bá PNTL,” dehan Vise-Ministru Interiór, António Armindo, iha servisu fatin MI villa-verde, Dili, kuarta ne’e.

Primeiru-Ministru no Ministru Interiór, Taur Matan Ruak, ho Komandante Jerál PNTL, Komissáriu Faustino da Costa preukupa ho kondisaun infraestrutura no mós tranporte bá PNTL ne’ebé la merese ona atu uza hodi hala’o servisu.

“Sira kontinua nafatin sira-nia infraestrutura, kontinua nafatin sosa sira-nia kareta, tanba ita hatene katak, PNTL importante loos, ita iha 39 eskuádras tinan barak ona laiha kareta, ha’u ho Ministru, Komandante Jerál mós preukupa loos, mais no fim ita hatene, governu nia tetu ne’e hatete ona katak, tetu ne’e oituan, ami mós tenki jere oinsá par programa ne’e bele tau osan oituan,” tenik nia.

Entretantu, OJE tinan 2022 bá PNTL hamutuk milliaun $ 32, no husi Ministériu Interiór ne’ebé kompostu husi Servisu Migrasaun no Protesaun Sivíl hamutuk milliaun 22.(ant)