Meteorologia Timor Leste Komfirma Rai Nakdoko Ho Magnitude 7,48 Laiha Poténsia Bá Tasi-sa’e

Smnewstl.com 30-12-2021 (Dili) — Iha tuku 3:25 madrugada mosu fenómena rai nakdoko besik minutu ida ho nia Magnitude 7.48 Skala Richter (SR) ne’ebé halo komunidade tomak tauk no paniku ho ameasa atu mosu tsunami ka tasi-sa’e.

Ba situasaun ne’e, Diretór Nasionál Meteorolojia no Jeofízika (DNMJ), Terencio Fernandes Moniz konfirma, situasaun ne’e mosu kauza husi deformasaun plaka husi parte norte Maluku Indonézia ne’ebe mak da’et tama to’o Timor-Leste husi 121km entre Maluku Indonézia mai Jaco Lautém.

“Rai nakdoko ne’e akontese ohin madrugada 3:25 hanesan ne’e ho nia distánsia besik liu Timor ne’e iha Lospalos iha 121km husi ninia episentru akontese ne’e, ninia Magnitude mak 7.48 SR,” informa Diretór DNMJ, Terencio Fernandes Moniz, bá Smnewstl, kinta ne’e nia knaar fatin Ministériu Transporte Komunikasaun eis Merkadu Lama, Dili.

“Tanba saida mak mosu? Tanba iha ne’ebá iha akontese tipu rai nakdoko nia durasaun kuaze besik minutu 1, kauza husi deformasaun plaka husi tersubdeksi, ne’ebé deformasaun fatuk iha subdesaun tasi banda sea nia okos,” hatutan nia.

Maski rai nakdoko ho Magnitude 7.48 eskala richer, maibé sei la akontese tasi-sa’e, tanba profunidade 177km husi rai leten tun bá tasi okos.

“Laiha poténsia atu akontese tsunami, tanba ninia profunidade (kedalaman) ne’e iha 177 km, ne’ebé nia la provoka par atu mosu tsunami, depois ho tasi kle’an demais ne’e mak nia la provoka tsunami. Husi Maluku parte sentru ne’e to’o iha ita-nian Lospalos ne’e kuaze 121km, ne’ebé nia laiha poténsia tsunami,” esplika Terencio.

Maibé nia subliña, bainhira profunidade tasi ladún naruk ho mininal 10km de’it, maka iha potensialidade boot atu akontese tsunami, tanba ho rai nakdoko ne’ebé no nia Magnitude 7.48 eskala richer.

enkuanto rai nakdoko ne’e rasik rezulta rai halai iha parte leste ne’ebe dadaun ne’e parte Secretaria Estado Protesaun Sivil foti ona dadus nune’e bele fo sai ba publiku.(ant)