MESSK Propoin Miliaun $5.186,739 Hodi Finansia Programa 3 ho Atividade 25 Iha 2022

Smnewstl 05-11-2021 (Dili) – Ministru Ensinu Superiór Siénsia no Kultura (MESSK), Longuinhos dos Santos akompañadu husi Sekretáriu Estadu Arte no Kultura (SEAK), Sesta-feira ne’e, halo audiénsia ho Komisaun G Parlamentu Nasionál (PN) hodi aprezenta proposta Orsamentu Jerál Estadu (OJE) tinan fiskál 2022 hodi hetan apresiasaun.

Iha audiénsia públika ne’e, MESSK aprezenta proposta Orsamentu Jerál Estadu (OJE) tinan 2022 no hetan apresiasaun husi Komisaun G PN ho montante milliaun $ 5.186,639 hodi finansia programa priordade tolu, sub-programa sia no atividade 25 iha tinan oin.

Ministru MESSK, Longuinhos dos Santos afirma, prposta OJE MESSK nian hetan apresiasaun boot husi Komisaun G PN, tanba ne’e, MESSK kanaliza ona lívru orsamentu bá PN, nune’e bele fasilita deputadu estuda no halo diskusaun.

Nune’e, orsamentu ho montante milliaun $ 5.186,739 ne’e, koloka bá iha saláriu vensimentu, bens no servusi, kapitál menór, kapitál dezenvolvimentu no transferénsia públika.

“Iha MESSK ne’e iha tinan ida-ne’e iha programa tolu, iha sub-programa sia no atividade 25, husi programa ida-ne’e ita koloka orsamentu bá 2022 tetu fiskál $ 5.186,739 dolares amerikadu, ida-ne’e ita koloka bá programa tolu no mós ita koloka bá kategoria 4 ne’ebé kategoria bá saláriu vensimentu, bens no servisu, transferénsia públika no mós capital dezenvolvimentu, ida-ne’e mak totál $ 5.186,739,” informa Ministru Longuinhos dos Santos, hafoin remata audiénsia públika iha PN, sesta ne’e.

Programa tolu ne’ebé MESSK sei implementa iha tinan oin hanesan, kultura no patrimóniu, boa-governasaun no jestaun institusionál no ikus mak programa edukasaun no informasaun.

“Programa tolu primeiru mak kultura no patrimóniu, segunda boa-governasaun no jestaun institusionál, tolu mak programa edukasaun no informasaun,” esplika nia.

Governante ne’e hatutan, durante diskusaun iha Komisaun G PN, MESSK la aprezenta proposta adisionál, tanba respeita desizaun husi Primeiru-Ministru, Taur Matan Ruak nian katak, bainhira proposta OJE 2022 aprovadu iha konsellu ministru, no submete ona bá PN, maka sei laiha tan proposta adisionál.

Entretantu, progressu ezekusaun OJE 2021, MESSK ezekuta ona hamutuk 74% husi totál orsamentu milliaun $ 4.420,846, husi montante tetu fiskál OJE 2021 hamutuk $ 6,133,915.

Orsamentu milliaun $ 4.420,846 ne’e, MESSK ezekuta ona bá programa prioridade haat hanesan, promove kultura Timor-Leste nian, bá ensinu superior nian, boa-governasaun no komisaun nasionál UNESCO Timor-Leste.(ant)