MESSK Oferese Bolsu Estudu Bá Dosente Universidade Privadu Na’in 140

Smnewstl.com 15-12-21 (Dili) — Ministériu Ensinu Superiór, Siénsia no Kultura (MESSK), oferese bolsu estudu bá dosente sira husi universidade privadu hodi hasai kursu pos-graduasaun bá mestradu no doutoramentu durante tinan 2 iha nasaun CPLP.

Iha Kuarta-Feira ne’e, MESSK hahú halo teste lian Portugeza bá dosente husi universidade privadu ne’ebé kandidata bá iha bolsu estudu ne’e, sira iha kampus IOB, fomentu, Dili.

Formadora Lian Portugés iha MESSK, Suzana Gonçalves hateten, MESSK oferese vaga 56 bá professores husi universidade privadu sira atu kandidata bá bolsu estudu bá pos-graduasaun hanesan bolsa bá mestradu, doutoramentu iha nasaun hodi bá hala’o estudu iha nasaun CPLP.

Suzana hatutan, tanba situasaun Covid-19, tan ne’e, Portugál de’it mak oferese kondisaun seguransa bá kandidatu sira iha bolsu estudu 56 ne’e.

“Momentu ida-ne’e sei iha faze izame bá ema na’in 140, bá de’it professores sira husi universidade privadu, UNDIL, Institutu João Saldanha, IOB, DIT, UNPAZ bá instituisaun universidade privada sira haruka sira-nia kandidatu mai,” dehan Formadora Lian Portugés iha MESSK, Suzana Gonçalves, iha IOB, kuarta ne’e.

Kandidatu na’in 140 ne’e, passa ona bá tuir formasaun lian Portugés ne’ebé sei hahú iha fulan Fevereiru to’o fulan Jullu tinan 2022, no Setembru 2022 aranka bá Portugal.

“Sé karik Setembru, agora halo teste depois hili kandidatu sira, depois kandidatu sira halo kursu Portugés hahú Fevereiru remata Jullu depois Setembru bá Portugál,” tenik nia.

Sorin seluk, Dosente Universidade da Páz (UNPAZ), Lucio Barros agradese bá governu liu husi MESSK, tanba bele fó oportunidade bá dosente sira husi universidade privadu atu bá hala’o estudu iha nasaun CPLP hodi aumenta tan sira-nia kapasidade.

“Hanesan dosente iha universidade privadu ne’ebé iha oportunidade ne’e bolsu estudu ne’ebé mak oferese husi estadu, liu-liu bá kooperasaun CPLP, entaun ida-ne’e mai ami orgullu teb-tebes, tanba governu bele oferese oportunidade bolsu estudu husi CPLP,” dehan Lucio.

Lucio Barros garante, sira sei aproveita oportunidade ne’e atu bele hasa’e liután sira-nia kuiñesimentu, tanba lian Portugés nu’udar lian ofisiál Timor nian ne’ebé konsagra ona iha konstituisaun RDTL.(ant)