MESSK Komemora Loron Nasionál ES Ho Diskursu Públiku Ho Lian Portugés

Smnewstl.com 24-11-2021 (Dili) – Ministériu Ensinu Superiór Siénsia no Kultura (MESSK), komemora loron nasionál Ensinu Superiór (ES) ne’ebé monu iha dia 17 Novembru no mós selebra loron mundiál siénsia bá páz no dezenvolvimentu.

Atividade ne’ebé hala’o iha komemorasaun ne’e mak hanesan diskursu públiku ho lian ofisiál Portugés no mós rekrita kreativa husi estudante universitáriu sira husi universidade públiku no privadu hanesan UNTL, São João de Brito, IPB, IOB no seluk tan.

Diretora Jerál Ensinu Superiór no Siénsia, Maria Filomena Lay Guterres hateten, objetivu husi atividade ne’e promove estudante sira halo debate iha públiku ho lian Portugés, nune’e mentaliza estudante sira atu ko’alia Portugés, tanba Portugés nu’udar lian ofisiál Timor-Leste nian.

“Ministériu iha atividade rua mak diskursu sientífiku diskursu públiku no mós rekrita kreativa. Objetivu bá ita-nia selebrasaun ida-ne’e la seluk ida, atu promove no oferese oportunidade bá reflexaun ho debate ne’ebé hatudu kompeténsia husi estudante husi Ensinu Superiór liu-liu bá loron ida-ne’e, ne’ebé diskursu públiku liu-liu bá kompeténsia linguístika iha língua ofisiál rua, bá ohin ne’e língua Portugeza,” dehan Diretór Jerál, Maria Filomena Lay Guterres, iha salaun Fundasaun Orient, Dili, kurat ne’e.

Maria Filomena Lay hatutan, joven barak hatene ko’alia lian Portugés, maibé ladún iha korajen atu ko’alia lian Portugés iha públiku, tan ne’e, MESSK promove debate refere atu mentaliza sira ko’alia lian Portugés iha públiku.

Alem de ne’e, liu husi debate ne’e mós, promove kreatividade no pensamentu krítiku bá estudante sira atu espressa sira-nia hanoin ho lian Portugés.

“Realidade hatudu katak, joven barak mak hatene, maibé ladún iha korajen atu ko’alia iha públiku, hein katak, oportunidade sira hanesan ne’e, joven sira uza atu hakbiit sira-nia aan no halo sira sai korajen liután atu bá públiku ho lian Portugés,” dehan nia.

Eventu ne’e mós parte atu estudante Ensinu Superiór sira halo reflexaun kona-ba oportunidade no dezafiu liu-liu ligadu ho pandemia Covid-19.

Eventu hanesan ne’ebé hala’o iha tinan kotuk 2020, MESSK foka liu bá ambiente moos.(ant)