Membru UEP 800 Preparado ba Seguransa Eleisaun Prezidensiál

Smnewstl.com 25-01-2022 (Dili) — Polísia Nasionál Timor-Leste (PNTL) liu husi Komandu Unidade Espesiál Polísia (UEP) hahú prepara ona membru sira liu husi formasaun no treinu hodi fó seguransa iha eleisaun prezidensiál ne’ebé sei hala’o iha loron 19 fulan Marsu tinan 2022.

Komandante UEP, Superintendente Xefe Orlando Gomes hateten, Prezidente Repúblika (PR), Francisco Guterres Lú-olo dekreta ona kalendáriu eleisaun prezidensiál, tanba ne’e, UEP hahú prepara ona membru sira liu husi treinamentu, formasaun tantu fíziku iha aulas fó formasaun bá membrus tomak par preparasaun hodi asegura seguransa bá eleisaun prezidensiál.

“Espesiál bá UEP hahú dadauk preparasaun liu husi treinamentu, liu husi formasaun sira-ne’e par prepara bá iha eleisaun sira-ne’e. Kona-ba transporte ne’e ita hetan apoiu husi Komandu Jerál par apoiu mai UEP par atu ezerse nia servisu la’o ho di’ak, par atu bele garante seguransa bá eleisaun prezidensiál,” dehan Superintendente Xefe Orlando Gomes, iha UEP Bairru-Pite, Dili, Tersa ohin.

Dadauk ne’e, UEP liu husi kompañia Korpu Seguransa Pessoál (CSP) mós prepara oan membru sira atu fó seguransa bá kandidatu Prezidente Repúblika sira, maibé depende bá orientasaun husi Komandante Jerál PNTL nian.

“Agora dadauk ita iha preparasaun de’it, ita prepara ona membrus sira atu bá kandidatu, maibé ita hein orientasaun husi Komandu Jerál, ha’u labele foti desizaun, UEP ita só prepara membru sira, bainhira hetan ona despaixu husi Komandante Jerál PNTL ita nomea par atu bele asegura bá kandidatu sira,” tenki nia.

Sorin seluk, Komandante CSP, Inspetór Xefe Marcos Lopes reforsa, totál efetivu CSP hamutuk na’in 265, no komandu CSP koloka hodi fó apoiu seguransa bá órgaun soberanu sira no mós instituisaun hanesan Provedoria Direitus Umanus Justisa (PDHJ), Komisaun Anti Korrupsaun (KAK) no Prokuradór Jerál Repúblika (PJR) no mós Embaixadór Estadus Unidus Amérika (EUA).

Inspetór Xefe Marcos Lopes esplika, CSP koloka membru sira hodi fó apoiu seguransa bá líder órgaun soberania hanesan Prezidente Repúblika, Prezidente Parlamentu Nasionál, Primeiru-Ministru no Prezidente Tribunál Rekursu, tuir grau ameasa ne’ebé iha.

“Tuir planu komandu CSP nian kolokasaun membru sira-ne’e ita haree grau ameasa, agora dadauk órgaun soberanu 5 bá leten, membru governu 3 ou 4 pessoas hanesan ne’e. Eis titulár hanesan, ne’e 5 bá leten, tanba ne’e eis titulár Prezidente, Primeiru-Ministru inklui Prezidente Parlamentu, ne’e koloka tuir grau ameasa,” tenik nia.

Marcos Lopes subliña tan katak, dezde inísiu harii Komandu CSP iha tinan 2004, membru CSP sira hetan apoiu formasaun no treinu husi United Nation Police (UNPOL), no haruka bá tuir treinamentu iha Thailandia no nasaun seluk tan.

Maibé, husi tinan 2004 to’o tinan 2010, PNTL prepara ona membru sira atu sai treinador hodi fó treinu bá membru CSP foun sira atu sai skoltu bá alta entidade ka membru VIP, eis titulár no VIP sira.

Entretantu, daduak ne’e, UEP iha membru hamutuk na’in 800 resin, ne’ebé sei hatun hotu hodi asegura eleisaun prezidensiál to’o remata.(ant)