Membru PNTL Na’in 34 Selesionadu ba Formasaun Ofisial Inspetór, Ida Rejigana Aan

Smnewstl.com 15-11-2021 (Dili) – Komandu Polísia Nasionál Timor-Leste (PNTL) abertura Kursu Promosaun Ofisiál Inspetór (CPOI) daruak bá membru na’in 34 hodi promove husi Sarjentu bá ofisiál médiu.

Iha abertura, Komisáriu Faustino da Costa rekoñese, membru barak mak iha kapasidade no esperiénsia servisu, maibé liu husi prosesu selesaun, ikus mai na’in 34 mak pasa hodi tuir kursu refere.

Faustino afirma, bainhira kursu hotu, Komandu sei avalia fila-fali, ida-ne’ebé hetan valór di’ak mak sei hetan promosaun.

“Lalika hanoin dehan katak, sira tuir ona kursu ne’e, depois de semana 10 tuir durasaun ne’ebé iha, sira sei imediatu hetan promosaun la’e.

Sei liu husi prosesu, kuandu passa ho valór di’ak, klaru sei hetan, maibé kuandu la konsege atinji valór mínimu ne’ebé iha, ita sei avalia,” dehan Komandante Jerál PNTL, Komisáriu Faustino da Costa, iha Akademia Polísia Comoro, Dili, Segunda ne’e.

Lider masimu PNTL ne’e sente triste ho membru na’in ida ne’ebé hato’o pedidu rejiganasaun bá Komandu ho rajaun moras.

“Triste tanba, husi 35 kandidatus ne’ebé iha, ida halo rejigana a’an, ne’e buat ida ita bele dehan, ema hotu-hotu ohin hakarak atu partisipa iha kursu sira hanesan ne’e, maibé membru PNTL ida halo fali pedidu rejigna aan fali husi kursu ne’e, mais desizaun ne’e fila-fali bá ema ida-idak nian e Komandu mos labele obriga,” dehan Faustino da Costa.

Nia sublinha, husi kandidatu na’in 34 ne’e, kompostu feto nain 4 no mane 30, tan ne’e ne’e fi’ar katak, sira hotu bele hetan valór ne’ebé di’ak atu hetan promosaun diviza ofisiál nian.

Sorin seluk, Komandante Sentru Formasaun Polísia, Superintendente Xefe Arquimino Ramos hateten, kursu CPOI segundu ne’e nu’udar kursu extra-ordináriu bá kandidatu na’in 34 ne’e, ne’ebé la pasa iha izame promosaun ne’ebé hala’o iha tinan 2010 no 2013, nune’e bele valoriza sira-nia servisu ne’ebé durante ne’e fó bá instituisaun PNTL.

“Promosaun ida-ne’e extra-ordináriu ne’ebé fó liu bá eis Komandante Munisípiu, Unidade Seksaun no Eskuádra sira-ne’ebé la pasa iha izame promosaun iha 2010, 2013 no Komandu hanoin katak, presiza fó valorizasaun bá kontribuisaun ne’ebé sira halo ona iha sira-nia karreira tomak, embora sira la pasa iha izame promosaun tempu liu bá, maibé sira kontribui liu bá instituisaun PNTL bainhira instituisaun ne’e harii,” dehan Arquimino Ramos.

Mekanízmu promosaun CPOI segundu ne’e, lideradu Segundu Komandante Jerál PNTL, Komisáriu Mateus Fernandes, nune’e bele realiza formasaun ne’e hodi promove membru sira husi Sarjentu bá ofisiál médiu, tanba maioria membru sira-ne’e iha ona esperiénsia hanesan Komandante Munisípiu, Unidade, Seksaun, eskuádra no seluk tan.

“Sira-ne’e bá ofisiál médiu husi Sarjentu bá iha ofisiál médiu aban bairua sira sei komanda kompañia, komanda eskuádra, pelotaun, seksaun sira iha munisípiu, unidade, ne’ebé kursu lideransa ho jestaun ne’e prinsipál ne’ebé sira hetan durante kursu ne’e” subliña Arquimino Ramos.

Matéria bá formasaun ne’e kona-ba jestaun operasionál no tátika operasionál oinsá mak lidera ekipa iha terenu, oinsá mak lidera operasaun, oinsá mak prepara planu operasaun ida di’ak no seluk.

No formador sira mai husi inspetór sira iha Sentru Akademia Polísia rasik, inklui dosente universidade no majistradu judisiál balun ne’ebé sei hanorin kona-ba lei no kódiku penál no kódiku prosesu penál ninian.

Kursu CPOI segundu ne’e, fízika hala’o iha Rairobo, no teoria sei hala’o fali iha sentru formasaun Polísia Comoro, Dili.

Entretantu, kursu CPOI segundu ne’e hetan apoiu fundus husi Institutu Nasionál Administrasaun Públika (INAP) ho Fundu Dezenvolvimentu Kapitál Umanu (FDCH), tanba PNTL rasik laiha orsamentu atu realiza formasaun refere.(ant)