Membru Mbx-Uap Na’in-30 Ajuda Kontrui Hikas Rezidensia Sanjoba Ainaro

Smnewstl.com-AINARO, 01 Marsu 2023- Membru Movimentu Brigada Xanana (MBX) no Unidade Asaun Progresu (UAP) hamutuk ema na’in-30 dezloka ona ba Munisipiu Ainaro hodi ajuda hadia rezidensia madre Kolegio Santa Josefinha Bakhita (SANJOBA) Ainaro-Vila ne’ebé anin sobu.

Portavoz Ekipa MBX no UPA, Americo Maia informa ekipa,  simu otirnrtasaun hosi  Lider Istoriku Kay Rala Xanana Gusmão iha loron segunda (27/02/23) lokoraik no tersa (28/02/23) dader kompras kedas kalen, bisi, simente hodi orienta kedas ekipa na’in-30  lori kedas ekipamentu ba Ainaro.

Ekipa ne’e kompostu hosi badaen na’in-5 ajudante soldadura hamutuk na’in-25 ezekuta hela servisu.

“Agora dadaun ami iha ona Ainaro halo ona servisu sobu hikas kalen sira ne’ebé anin sobu hodi monta hikas kalen foun inklui monta besi hodi rekupera fila fali fasilidade hirak ne’ebé hetan estragus. Madre sira mós agradese simu ami ho kontenti tamba ami ajuda servisu ne’e,” dehan Portavs Americo.

Tuir orientasaun Maun Boot Xanana atu ekipa finaliza servisu ne’e durante semana tolu hodi ajuda madre sira hadia mós kondisaun moru ne’ebé anin sobu.

Iha fatin hanesan, Superiora Kolegio Santa Josefinha Bakhita (SANJOBA) Ainaro, Me. Elda Albina Bibina Fdcc hato’o agradese ba Maun Xanana ne’ebé orienta servisu rapidu.\

Rezidensia madre sira nian hetan estragus iha oras 1:30 madrugada loron 2 Janeiru 2023. (SANJOBA) Ainaro-Vila lidera hosi  Superiora Me. Elda Albina Bibina Fdcc, hamutuk ho Me. Maria Fatima Pereira, Emmiliana Soares Fdcc, Me. Dulce Fdcc no Me. Dulce Fdcc durante ne’e tau matan ba estudante hamutuk na’in 15 no estudante lubuk ida ne’ebé hala’o sira nia estudu iha Eskola Terseiru Siklu no Sekundariu Kolegio Santa Josefinha Bakhita (SANJOBA) Ainaro-Vila.(Smnews)