Membru Governu Festa Iha Liquica, Porta-Voz Governo Lakoi Komenta

Smnewstl.com 01-09-2021 (Dili) — Ministru Prezidénsia Konsellu Ministru, Fidélis Magalhães, prefere lakoi atu fó deklarasaun bá públiku relasiona ho membru governu balun ne’ebé viola regra konfinamentu obrigatóriu hodi partisipa iha festa kazamentu ida iha Munisípiu Likisá.

Ministru Fidélis Magalhães konfima, kestaun ne’e, Primeiru-Ministru, Taur Matan Ruak mak iha direitu atu responde hanesan xefe Governu bá membru governu tomak.

“Kona-ba responsabilidade ida-idak ne’e depois assuntu ne’ebé depois ita futuru, ita-boot sira bele husu señór Primeiru-Ministru nu’udar Xefe ami hotu nian, no mós bele husu bá membru governu relevante tanba saida mak sira hola desizaun ne’ebé mak sira karik sira hola duni.? Entaun ha’u la presiza atu responde bá assuntu ida-ne’e,” dehan Ministru Fidélis Magalhães, hafoin remata enkontru iha ministériu finansas kuarta ohin.

Fidélis Magalhães hatutan, nia rasik deside suspende eventu sira ho natureza privadu, tanba lakohi ahi kontra fali desizaun ne’ebé konsellu ministru foti.

Tanba tuir nia katak, desizaun ne’ebé sai husi konsellu ministru ne’e desizaun ne’ebé a’as liu hotu iha governu, tanba membru sira mak deside hamutuk.

“Sé ita-boot husu bá ha’u pessoalmente karik, ha’u-nia desizaun hanesan membru governu, ha’u dehan, ha’u iha obrigasaun atu kumpre desizaun hotu ne’ebé mak konsellu ministru ami hotu inklui ha’u rasik deside, tanba ida-ne’e ha’u rasik mós kansela eventu sira ho natureza privadu ne’ebé mak bele kontra fali ho desizaun ne’ebé mak konsellu ministru hola,” afirma Fidélis.

“Ida-ne’e hanesan ezemplu ne’ebé ha’u fó hanesan ezemplu pessoál ida, agora kona-ba motivu ida-idak nian, ha’u labele responde iha momentu ida-ne’e, ita-boot sira bele husu diretamente bá sé-sé mak ita-boot sira hakarak husu pergunta ida-ne’e,” subliña nia.

Porta-voz Governu ne’e esplika, konsellu ministru iha nia mekanízmu rua atu foti desizaun mak hanesan, desizaun foti jo konsensus, no mós mekanízmu seluk liu husi votasaun, tanba konsellu ministru nu’udar órgaun a’as liu iha governu.(ant)