Membru Governo 7 Susesu Promove Rikeza Timor Iha Expo Dubai

Smnewstl.com 21-10-2021 (Dili) – Delegasaun membru governu na’in 7 ne’ebé reprezenta estadu Timor-Leste partisipa iha expozisaun Dubai 2020 konsege promove ona potensialidade no rikeza Timor bá investor internasionál sira liu husi forum business emprezariál.

Ministru Koordenadór Assuntus Ekonómikus (MKAE), Joaquim Amaral hatete, explorasaun potensialidade no rikeza Timor-Leste nian iha Expo Dubai ne’e liu husi forum business ne’ebé Timor-Leste organiza iha kontestu Expo Dubai, tanba forum business ne’e partisipa mós husi investór internasionál sira.

“Ita fó informasaun kona-ba ita-nia pontensialidade ne’ebé Timor-Leste iha bá investidór husi rai li’ur, sira koñese liu Timór no koñese mós Timór nia rikeza, hein katak, sira bele mai esplora Timór nia potensialidade ne’ebé iha atu bele ajuda ita-nia setór privadu nasionál sira atu bele dezenvolve no esplora riku sira-ne’ebé iha inklui esplora kafé no halo estetifikasaun bá iha ita-nia kafé sira,” dehan Ministru Joaquim Amaral, iha Aeroportu Nicolau Lobato.

Iha expozisaun Dubai 2020 ne’e mós, alem de ne’e delegasaun Timor-Leste aprezenta produtu kafé iha forum business emprezariál ne’e, maibé aprezenta mós kona-ba potensialidade iha área petrolífer nian, hanesan mina no gás iha forum refere, nune’e bele atrai investor sira mai investe iha Timor-Leste.

“Ita presiza duni hametin ita-nia promosaun, atu nune’e ema sira-ne’ebé hakarak mai haree ita-nia potensialidade saida mak ita iha la’ós de’it kafé, iha forum business ne’e mós ita promove ita-nia mina ho gás bloku 18 ne’ebé ita identifika no lansa ona, ita submete hotu ona bá forum business forum emprezariál ne’ebé iha,” tenik nia.

Iha forum business emprezariál ne’e mós, Ajénsia Promosaun Investimentu Trade Invest Timor-Leste, SERVE no mós ajénsia sira seluk tan, ida-idak aprezenta ninia área, no aprezenta mós kona-ba lei investimentu ne’ebé Timor-Leste iha bá empreza internasionál sira.(ant)