Membru Foun Falintil-FDTL 8 Elemina Inklui Feto Ida Kauza ‘Isin Rua’

Smnewstl.com 27-09-2021 (Dili) – Komandu FALINTIL Forsa Defeza Timor-Leste (F-FDTL) hasai membru foun na’in 8, tanba balun involve iha grupu arte marsiais inklui feto ida mak ho kondisaun grávida ‘isi-rua’.

Xefe Estadu Maiór Jenerál F-FDTL, Tenente Jenerál Lere Anan Timur hato’o assuntu ne’e, hafoin halo instrodusaun bá membru foun na’in 600 molok desloka bá asarama hodi tuir formasaun durante fulan tolu iha sentru instrusaun Metinato.

Lere hatutan, husi iha na’in 8 ne’e komandu F-FDTL hasai ne’e, iha ona substituisaun foun, nune’e bele kompleta kuota na’in 600.

“La’ós na’in 5 na’in 8, tanba feto ida estadu (isin-rua) ita konta dehan na’in 8, na’in 8 sempre tenki iha ninia substituisaun par kompleta 600 ne’e, substituisaun iha agora dadauk, sira la tama porque balun la mai, balun arte marsiais,” dehan Lere Anan Timur, segunda ohin iha kuartel jenerál Fatuhada.

Lere hateten, kritériu ne’ebé importante iha prosesu teste ida mak onestidade, tanba ne’e, kandidatus sira prinxe ona iha formuláriu bainhira tuir teste, tanba instituisaun militár presiza ema ne’ebé onestu no lealdade bá komandu.

“Mais kritériu ida mak ita tenki sinseru, sira la mai sinseru sira dehan katak, laiha, depois teste hotu sai bá tuku malu, baku malu querzer la sinseru não é. Militár ita tenki sinseru, sé laiha sinseridade ita bele dehan katak, komandu bele oinsá mós laiha susesu iha instituisaun nia laran, tanba ida-ne’e,” afiirma nia.

Balun ne’ebé komandu hasai, tanba depois de teste hotu, sira hetan asidente no liman, ain hetan naksalak, tanba ne’e komisaun halo kedas substituisaun, tanba rekrutamentu F-FDTL labele hein, nune’e bele kompleta númeru 600 hodi inkorpora bá instituisaun.(ant)