Membru F-FDTL 30 Remata Kursu Estájiu Protesaun Seguransa Autoridade

Smnewstl.com 04-10-2021 (Dili) – Xefe Estadu Maiór Jenerál Forsas Armadas, Brigadeiru Jenerál Calisto Santos ‘Coli Coliati’ ofisialmente ensera kursu kona-ba protesaun no seguransa autoridade tinan 2021 no mós entre sertifikadu bá formandus na’in 30.

Membru FALINTIL Forsas Defeza Timor-Leste (F-FDTL) hamutuk na’in 30 husi komponente 6 termina ona kursu estájiu kona-ba protesaun no seguransa autoridade tinan 2021 iha kuartel unidade Polísia Militár.

Diretór Estájiu Protesaun no Seguransa Autoridade 2021, Kapitaun Francisco Xavier dos Reis Neto hateten, estájiu seguransa protesaun autoridade 2021 ne’e dala uluk iha kuartel unidade Polísia Militár ho durasaun tempu semana-rua.

Kursu refere hahú husi loron 20 Setembru to’o loron 1 Outubru tinan 2021, nune’e iha loron 4 Outubru 2021 halo enseramentu.

Tanba kursu seguransa protesaun autoridades refere ninia finalidade mak atu padroniza no iniformiza membru sira husi komponente hotu iha instituisaun F-FDTL laran, nune’e bele fó seguransa bá autoridade no VIP sira bainhira nasaun presiza.

“Finalidade husi kursu ida-ne’e mak fó espesializa militár sira-nia atividade nu’udar seguransa par padroniza no uniformiza seguransa autoridades nian iha ekipa seguransa autoridade nian,” dehan Kapitaun Francisco Xavier dos Reis Neto, iha diskursu hafoin halo enserramentu bá kursu refere iha kuartel unidade Polísia Militár Quintal Boot, Dili. Segunda ohin.

Komandante Interinu Unidade Polísia Militár, Kapitaun Francisco Xavier dos Reis neto informa, kursu refere realiza bazeia despaixu husi Xefe Estadu Maiór Jenerál F-FDTL hodi halo formasaun bá membru sira husi komponente hotu.

Instrutór bá kursu refere husi unidade Polísia Militár hamutuk na’in tolu, no hetan apoiu husi assessor bá pos estájiu husi Brazileiru na’in ida.

“Iha estájiu ida-ne’e nia inatrutores husi membru Polísia Militár rasik, kompostu husi Alferis na’in tolu, Alferis Francisco Boavida nu’udar Xefe Kursu, Alferis Olderico de Araújo no Alferis Filipe da Costa Freitas nu’udar inatrutores, Asessór PM nu’udar asesu bá pos estájiu ida-ne’e. Ha’u mak sai Diretór bá Ensinu bá Estájiu ida-ne’e,” subliña nia.

Soriin seluk Xefe Estadu Maiór Jenerál Forsas Armadas, Brigadeiru Jenerál Calisto Santos ‘Coli Coliati’ hateten, formasaun ne’e importante tebes bá membru F-FDTL sira, nune’e bele padroniza no uniformiza prosedimentu bá kondutór no eskoltas sira.

Ne’eduni, liu husi formasaun refere, bele prepara ona membru sira, nune’e bainhira iha pedidu ruma husi estadu no governu atu f’o seguransa bá autoridade polítiku no militár tantu husi rai laran no rai li’ur, sira prontu ona atu hala’o servisu.

“Ohin ita halo enseramentu bá formasaun bá motorísta no seguransa bá autoridade, imi-nia papel prinsipál mak atu fó seguransa bá autoridades militares, maibé mós iha oportunidade sira-ne’ebé ita-nia governu presiza imi sei prontu atu bele fó seguransa bá autoridade sivis no mós bá bainaka sira-ne’ebé dalaruma mai partisipa iha eventu sira-ne’ebé hala’o iha ita-nia estadu iha ita-nia nasaun,” dehan Brigadeiru Jenerál Coliati.

Coliato enkoraja formandus sira atu ka’er metin padraun no uniformiza prosedimentu ne’ebé mak hetan ona durante formasaun, nune’e ebele ajuda hodi hala’o servisu.

Maibé, Brigadeiru Jenerál ne’e mós husu unidade Polísia Militár atu akompaña nafatin membru F-FDTL ne’ebé mak hatudu postura hanesan militár tenki loke prosesu tuir Regulamentu Disiplinar Militár (RDM), tanba militár hahú husi ulun to’o ain, la’ós husi ain to’o de’it iha kakorok.

“Ha’u husu Polísia Militár tenki konsidera ida-ne’e haree, militár ida-ne’ebé fardadu mak nia la saida prosesa, ne’e indisiplina ne’e iha RDM, iha RDM ne’ebá par ita atu bele padroniza, uniformiza ita-nia prosedimentus ita-nia disiplina hanesan militár,” sujere nia.

Entretantu, formandus na’in 30 ne’ebé partisipa iha kursu refere kompostu husi kuartel jenerál 14, komponente Naval 6, komponente terrestre 2, komponente sentru formasaun i treinu 1, komponente apoiu servisu 3 no unidade FALINTIL.

Formandus na’in 30 ne’e, mai husi postus primeiru sarjentu ida, kabu na’in 11 no mós soldadu hamutuk na’in 18. No Kursu refere hala’o durante semana-rua nia laran iha oras 80.(ant)