Membro UPM 6 ‘Hurele’ Macos to’o Lakon Vida, FONGTIL Husu ‘Ejonera’ Komjer Faustino

Smnewstl.com 20-01-2022 (Dili) — Fórum ONG Timor-Leste (FONGTIL) konsidera, mandatu Komandante Jerál Polísia Nasionál Timor-Leste (PNTL), Komisáriu Faustino da Costa nian durante ne’e nakonu ho kazu mate mean.

FONGTIL hato’o preukupasaun ne’e ligado ho kazu omisídiu ne’ebé akontese iha loron 22 fulan Janeiru 2022, maizumenus tuku 3 madrugada iha suku Suai Loro Munisípiu Covalima, iha festa inaugurasaun uma lisan ida.

Membru Polisia pna’in 6 husi Unidade Polísia Marítima (UPM) ne’ebé destaka iha Munisípiu Covalima halo agresaun fízika hodi hamate sidadaun, Marcos Amaral ho idade 41 no hakanek matebian nia alin Júlio Amaral.

Koordenadór Advokasia FONGTIL, Ivo Colimau Lay Soares hateten, FONGTIL kondena aktu husi oknum upm ne’e, no husu governu liu-liu Ministru Interiór no Parlamentu Nasionál (PM) atu ezonera Komandante Jerál PNTL, Komisáriu Faustino da Costa husi nia kargu, tanba durante mandatu nakonu de’it ho kazu mate mean, hanesan akontesimentu kazu Lahane iha tinan 2021 no mós kazu iha Suai Covalima ne’e rasik.

“Ezonera Komisáriu Jerál PNTL, Faustino da Costa nu’udar Komandante Jerál PNTL, ho rajaun durante nia mandatu nakonu ho kazu mate mean ne’ebé involve ema sivíl nu’udar vítima no membru PNTL nu’udar suspeitu, (ref kazu Lahane no kazu atuál Suai Loro,” dehan Koordenadór Advokasia, Ivo Colimau Lay, liu husi komferénsia imprensa iha FONGTIL, Kaikoli, Dili, segunda ne’e.

Ivo haktuir katak, kazu ne’e akontese, bainhira membru UPM ne’e la’o isin kona malu ho vítima matebian Marcos Amaral iha festa laran. Komu la intende malu, entaun mosu dezintendimenu hodi rezulta agresaun fiziku hasoru Marcus to’o lakon vida.

“Sira na’in-rua maun alin dúvida katak ema ne’e, membru PNTL duni ga la’e, sira hakat bá festa laran ne’e hodi konfirma fila-fali ema ne’e, ita-boot membru forsa ou membru PNTL ga la’e.? Mais despois lansa pergunta ida-ne’e, suspeitu hamrik mai halo kedas agresaun fíziku hamutuk ho nia kolega sira hasoru sira na’in-rua maun alin Marcos ho Júlio, to’o Marcos lakon vida Júlio mak kanek,” haktuir Ivo Colimau.

Nia esplika, iha artigu 4 husi dekretu-lei n°.9/2009, de 18 Fevereiru hakerek klaru ona katak, situasuan ne’ebé obriga PNTL atu uza forsa hodi atus situasuan.

Tanba ne’e, FONGTIL ejize Ministru Interiór, atu ezonera Komandante kompañia UPM ne’ebé destaka iha Munisípiu Covalima, tanba laiha kapasidade atu kontrola nia membru sira.

“Prosesu autores ne’ebé partisipa iha kazu omisídiu refere hodi inkaixa bá prizaun,” afirma Ivo.

Sorin seluk, Porta-voz PNTL, Superintendente Xefe Armando Monteiro hateten, Komandu PNTL detein ona membru UPM na’in 6 iha sela detensaun Komandu Polísia Munisípiu Covalima durante oras 72 hodi submete bá prosesu investigasaun.

“Kazu ida mak sai preukukasaun bá públiku iha dia 23 mais ou menus oras tuku 4 madrugada iha Suai ne’ebé mak rezulta ita-nia juventude ida ho idade 41 anos ne’ebé mak halo esforsu tomak Komandu Polísia Munisípiu Covalima hodi hola medidas no halo investigasaun ona bá ita-nia sidadaun na’in 6 ne’ebé agora dadauk sei submte hela iha sela detensaun 72 oras nia laran,” dehan Superintendente Xefe Armando Monteiro.

Armando Monteiro afirma, Komandu Jerál PNTL kontinua monitoriza kazu ne’e, nune’e finalidade husi kazu ne’e autór sira tenki responsabiliza aktu ne’ebé sira komete tuir lei ne’ebé vigora iha Timor-Leste.

Entretantu, FONGTIL mós husu governu atu mellora polítika rekrutamentu bá membru PNTL liu husi meius psyco test ne’ebé duru, nune’e bele teste mentalidade membru sira.

Oras ne’e dadauk, mate isin Marcos Amaral ninia hela iha Ospitál Naisonál Guidu Valadares (HNGV) hodi submete bá otopsia.(ant)