Membro Governo Ida Nia Oan Hetan Asidente, Aman To’o Kedas Iha Caicoli Hato’o Keisa

Smnewstl.com 12-10-2021 (Dili) –Tersa-feira dader ne’e, mosu asidente ida iha Sumafro Kolmera Dili entre kareta rua ne’ebe, kareta ida kondus husi Vice Ministro Justisa, Jose Edmundo nia oan mane no ida seluk husi sidadaun feto ida.

Tuir kronolojia ne’ebe SMNews asesu iha Komando PNTL Caicoli Dili haktuir, kareta ne’ebe kondus husi Vise MJ nia oan mane maka soke kareta ne’ebe kondus husi sidadaun feto iha kedas Sumafro (Lampu Merah) Kolmera Dili.

Ho asidente ne’e, konsege hamosu dezentendimentu entre parte-rua ne’ebé involve iha asidente refere, tanba iha sidadaun iha família balun ne’ebé la involve iha asidente ne’e, halo fali agresaun fízika hasoru Vise MJ nia oan, tanba diskumfia hasai linguazen mal.

Lamenta ho asaun agreasaun fízika ne’ebé mosu, maka Vise MJ, José Edmundo Caetano, to’o kedas iha Komandu Polísia Munisípiu Dili, hodi hato’o keixa bá parte polísia atu prosesa tuir dalan legál.

“Ne’e mosu dezentendimentu entre ha’u-nia oan ne’ebé lori kareta, sira iha asidente ki’ik-oan ida, maibé ikus mai atu rezolve ho família, ikus mai mana ne’e nia katuas-oan mai baku ha’u-nia oan sira-ne’e maka sira kontaktu ha’u tenki mai halo keixa bá polísia,” dehan Vise MJ, José Edmundo Caetano, hafoin halo keixa iha Komandu Polísia Munisípiu Dili, Tersa ohin.

Governante ne’e dehan, nia oan rasik mak kondús kareta, tanba ne’e prontu rezolve tuir dalan família hodi hadi’a kareta ne’ebé aat.

Nia hatutan, la’ós membru Polísia mak halo agresaun fízika hasoru nia oan sira, maibé vítima nia kaben mak baku fali nia oan, tanba ne’e nia halo keixa bá Polísia.

“Ha’u-nia oan rasik, Andreas Eloi Caetano, asidente rezolve família kuandu iha sasán ne’ebé mak aat bele rezolve ou ita bele selu oinsá, ne’ebé mak gráve liu ita bele selu, mais halo violénsia integridade fízika ne’e labele,” lamenta Governante ne’e.

Parte seluk, vítima nia kaben ne’ebé lakohi fó nia identidade husu, Vise MJ, José Edmundo Caetano nia oan, bainhira lamenta ho asaun ne’ebé nia halo, bele hato’o keixa bá Polísia, nune’e bele prosesa tuir dala legál.

Nia dehan, bainhira mosu asidente nia laiha oin, maibé nia lamenta tanba, governante nia oan sira hasai linguazen mal hasoru nia kaben, nune’e nia foti asaun hasoru sira.

“Asidente ne’e ha’u laiha oin, soke sira uza linguazen mal ne’e tolok la para ne’e mak ha’u halo asaun. Saida mak o la satisfeitu, o hatama keixa Polísia prosesu ha’u, asaun ha’u-nian ha’u halo ona, tuir lei o halo keixa prosesu ha’u tuir lei ne’ebé mak iha, restu lalika diskuti, tanba la rezolve,” sujere nia.

Parte seluk, Komandante Polísia Tránzitu Munisípiu Dili, Inspetór Domingos Sarmento Gama hateten, Vise MJ hato’o keixa bá polísia, tanba iha relasaun ho asidente ida-ne’ebé akontese iha sumafro kolmera nian entre kareta ho kareta, nune’e mosu agresaun hasoru suspeitu sira.

Gama dehan, polísia tránzitu kontinua rejista kazu asidente tráfiku, no kazu krime agresaun fíziku nian keixa hato’o ba ekuadra polísia Vera Kruz.

“Parte ne’ebé mak sente vítima bá agreasaun fíziku ne’e, sira hanesan sidadaun ida sira iha direitu keixa hasoru suspeitu ne’ebé mak hasoru suspeitu ne’ebé mak halo agresaun fíziku, mais bá parte asidente ne’e, polísia tránzitu mak hatene, tanba evidénsia rua iha ona ita-nia fatin,” dehan Inspetór Domingos Gama.

Polísia tráfiku investigasaun asegura hotu suspeitu ho vítima sira, inklui mós evénsia sira iha komandu polísia munisípiu Dili, nune’e bele kontinua halo identifikasaun atu bele hatene motivu husi asidente ho krime agresaun fíziku refere.

“Vise-Ministru la satisfas mak iha agresaun fíziku balun mós akontese iha ne’ebá, agresauun fíziku akontese ne’e, la’ós parte-rua ne’ebé mak involve iha asidente, maibé, família husi parte involve asidente nian mai halo agresaun fíziku,” dehan nia.

Entretantu, hafoin parte-rua halo keixa iha eskuadra polísia Vera Kruz, maibé parte-rua deside hakotu ona prosesu ne’e, tanba hakarak rezolve tuir dalan família nian.(ant)