ME sei loke Bolsu Kandidatu, atu Professór kontratadu Konkorre

Smnewstl.com – Ministériu Edukasaun sei loke bolus kandidatu, atu professor sira ne’ebé kontratatu remata iha final fulan Dezembru bele konkorre hodi inklui iha kuadru permanente.

Desizaun ne’e opta, hafoin reuniaun entere Ministra Edukasaun, Dulce de Jesus, ho Sekretáriu Estadu Edukasaun Ensinu Sekundária Jerál no Ensinu Tékniku Vokasionál  Domingos Lopes Lemos ho reprezentante professor kontratadu husi munisípiu 12 no RAEOA.

Enkontru ne’ebé realiza iha Edifísiu ME Vila Verde, ko’alia kona-ba kontinuidade servisu, relasiona ho kontratatu laboral ne’ebé remata iha loron 31 fulan Dezembru.

Ministra Edukasaun promete atu servisu hamutuk ho professor sira, hodi hasa’e kualidade Sistema edukasaun iha Timor-Leste.

“Ha’u hanoin ne’e dalan di’ak ida mais ita hotu nafatin kumpri ba regra sira ne’ebé iha, tanba iha implementasaun bazeia ba regra ne’ebé eziste iha Ministériu Edukasaun liuliu kontratadu sira nomós dekretu lei nú 31/2023 ne’ebé mai husi VIII Governu no IX Governu Konstituisionál mai halo kontinuidade ba servisu ne’e no ida ne’e maka servisu Ministériu Edukasaun nian atu haree buat ne’ebé di’ak kontinua no ida ne’ebé ladi’ak ita buka dalan oin-oin atu bele hadi’a nafatin kualidade  edukasaun”, dehan Governante ne’e.

Asesór Legal  Ministériu Edukasaun nian Filipe Rodrigues Perreira relata katak, professor sira informado ona kona-ba fim husi kontratu laboral ne’e no governu sei halo mos avaliasaun dezempenu.

“Ligadu ho dekretu lei nú 31/2023, kona-ba avaliasaun dezempeñu ne’e halo ba professor kontratadu sira la’os halo ba profesór voluntáriu, tanba profesór voluntáriu ne’e ligasaun ho eskola de’it no ministeriu hatene halo avaliasaun ba professor  kontratadu ne’ebé ministériu halo kontratu,” Konklui Asesór ne’e.(SMnews)