ME sei Duplika Komprimissu Fiskal ba Merenda Eskolar

Smnewstl. com – Ministra Edukasaun anunsia duplikasaun kompromisu fiskál ba programa hahán eskola nasionál, relasiona ho dezafiu iha seitor edukasaun no problema sub nutrisaun.

Pozisaun ne’e anunsia, hafoin partisipa iha semináriu internasionál dahuluk kona-ba koalizaun merenda eskolár iha Paris, Fansa.

“Timor-Leste hetan independénsia liu tinan 20 liu bá, no ho apoiu husi WFP ami hahú ami-nia programa hahán eskola iha 2005. Iha tinan 2011 ami-nia Governu foti responsabilidade ba programa ne’e, no agora dadaun ami iha estudante maizumenus na’in 315,000 ne’ebé hetan benefísiu husi programa ne’e”, dehan Ministra Edukasaun iha nia intervensaun.

Governante ne’e hatutan, rezultadu balun husi implementasaun merenda eskolár ne’e simu ona feedback empíriku husi professor sira katak, estudante sira ladún moras hanesan baibain no agora ativu liu iha klase laran, informasaun ida-ne’e sai nu’udar indikadór ida ne’ebé hatudu impaktu pozitivu husi esforsu ne’ebé iha.

“Peskiza finál ida husi ami-nia parseiru ida-ne’ebé envolve iha hahán eskola deskobre katak bainhira hahán sira oferese iha eskola, atende maka’as liu no iha mós korrelasaun pozitivu ho rezultadu aprendizajen, tanba labarik sira bele foka di’ak liu iha klase bainhira sira la hamlaha. Bainhira ita halo ona levantamentu ba lider eskola sira kona-ba hahán eskola nian, iha akordu ida de’it katak fornese hahán ba ita-nia oan sira nu’udar fatór importante tebe-tebes hodi asegura sistema edukasaun ne’ebé kualidade”, dehan governante ne’e.

Ministra Edukasaun fundamenta katak, programa hahán eskola úniku mak promosa

un ba orta eskolár hanesan dalan atu hasa’e valór nutrisaun ba hahán no tama ona hanesan materiál kurrikulár, tanba fornese produtu fresku ne’ebé bele inkorpora iha hahán eskola nian hodi prodús mós nutrisaun lokál no sistema olístiku ida ne’ebé promove nutrisaun iha sustentabilidade.

Aleinde ne’e, programa hahán eskola hatudu sentidu komunidade no responsabilidade no exekutivu garante katak programa ai-han eskola nian implementa ona iha eskola rurál sira hodi hasa’e labarik sira-nia nutrisaun no mós ekonomia lokál.(SMNwes)