ME Partsipa Iha Asinatura Kontratu Entre Embaixada Japaun Ho ONG MAHON No Fundasaun São Francisco de Asssi

Smnewstl. com – Ministra Edukasaun Dulce de Jesus Soares partisipa iha asinatura kontratu entre Embaixada Japaun ho ONG MAHON no Fundasaun São Francisco de Assis hodi harii edifísiu eskola foun ho sala aula hamutuk tolu (3) no sala ba profesór sira ida (1), iha sala reuniaun Embaixada Japaun Farol, Segunda-feira ne’e.

Iha diskursu Ministra Edukasaun Dulce de Jesus Soares hateten, lori estudante, profesór/a no povu Timor-Leste nia naran hakarak agradese ba Embaixada Japaun ne’ebé mak sai amigo iha tempu naruk ona hodi tau atensaun no identifika edifísiu eskola sira ne’ebé governu seidauk iha oportunidade atu hadi’a eskola sira ne’e.

“Aproveita momentu ne’e husu ba ita bo’ot sira hotu atu bele servisu di’ak, nune’e apoiu sira ne’ebé ita hetan apoiu, tanba ne’e husu ba ita bo’ot sira hotu atu bele servisu di’ak, nune’e apoiu ne’ebé ita hetan bele uza ho máximu ba edukasaun ita nia oan sira nian”, dehan Ministra Edukasaun.

Governante ne’e hatutan, husu ba komunidade sira hotu atu kopera ho NGO sira, nune’e konstrusaun sala aula bele la’o ho di’ak no bele uza tuir objetivu ne’ebé ita hakarak

Iha fatin hanesan Embaixadór Japaun iha Timor-Leste Tetsuya Kimura hateten, asisténsia finansiamentu projetu komunitária no seguransa umana (GGP) ho objetivu atu benefisia komunidade local liu-liu sira iha área remota husi ne’e Japaun implementa ona ho susesu projetu hamutuk 136 iha teritóriu Timor-Leste tomak.

“Edukasaun bázika esensiál tebes ba dezenvolvimentu nasaun nian hanesan labarik no joven husi Timor-Leste mak sei responsabiliza ba dezenvolvimentu ekonómiku no sosiál nasaun ida ne’e iha futuru”, dehan Embaixadór Japaun.

Diplomata ne’e hatutan, Embaixada Japaun hamutuk ho governu subliña importánsia hodi mellora subsisténsia iha zona rural sira hodi reflete ba projetu barak ne’ebé implementa ona iha munisípiu sira.

Enkuantu husi projetu ne’e NGO MAHON sei konstrui edifísiu eskola primária Harekain iha suku Raimea, postu administrativu Zumalai, munisípiu Covalima no Fundasaun São Francisco de Assis sei konstrui edifísiu eskola sekundária iha suku Clauc, postu administrativu Fatuberliu, muisípiu Manufahi ho montante husi asisténsia kada projetu ho USD 72,992.(SMNews)