ME Observa Kondisaun Eskola Katólika no Públika ida iha Laga

Smnewstl.Com – Ministra Edukasaun Dulce de Jesus Soares observa kondisaun ensinu pré-eskolár Padre Jõao de Deus Pires no Ensino Básico Central (EBC) Soba Laga no sertifika katak, eskola rua refere la iha problema ho infraestruturas, maske iha kondisaun balun ne’ebe presiza hadi’a.

“Iha eskola EBC Soba Laga ne’ebé vizita barak liu iha sala aula ida estudante hamutuk na’in 25 to’o 30 no la iha problema kona-ba sala aula, maibé iha tempu bailoron sala aula ne’e ladún iha sirkulasaun ár ne’ebé mak di’ak, nune’e iha tempu bailoron senti manas”, dehan Ministra Edukasaun.

Tanba ne’e, Governante promete atu koko atu hadi’a prototipu konstrusaun nian, liu-liu atu hasa’e oituan nomós kona-ba janela sira, nune’e sirkulasaun ár no naroman iha sala laran bele la’o di’ak.

Parte seluk, ME mos nota katak, numeru inskritu ba estudante sira ladun barak no iha sala ida iha de’it na’in sira, tanba estudante barak mak desiste.

“Ministériu Edukasaun sei kontinua servisu ho líder komunitáriu no asosiasaun pais profesores hodi haree no enkoraza inan-aman atu bele lori oan sira mai eskola, liu-liu pré-eskolár ne’ebé hanesan fundasaun importante tebes ba oan sira atu aprende lee, kanta, loke livru no aprende hader sedu atu bele hatoman-an”, dehan Ministra Edukasaun.

Além de ne’e, governante ne’e mos halo teste literasia ba estudante ensinu pré-eskolár Padre Jõao de Deus Pires no Ensino Básico Central (EBC) Soba Laga, hodi descobre nível dominiu estudante nian ba leitura.

Tuir Dulce de Jesus, estudante barak mak hatene lee, maibe la fo atensaun ba asentuasaun sira, maibe husi estabelesimentu eskolar rua ne’e barak mak hatene ona lee no konta. (Smnews)