ME No Fundasaun Alola Deskuti Programa Ba Pré Eskolar Komunitária

Smnewstl. com – Ministériu Edukasaun no Fundasaun Alola kontinua sai parseiru estratéjiku ba implementasaun program programa pré eskolar comunitária iha munisípiu sira.

Ministra Edukasaun Dulce de Jesus no Diretora Fundasaun Alola deskuti ona programa no planu intervensaun conjunta ba tinan 2024 iha área identificada sira, tanba iniciativa implementa iha tinan kotuk, hatudu rezultadu satisfatóriu.

“Espresa sira nia apoiu kontinuasaun ba Ministériu Edukasaun iha eskola sira ne’ebé sira halo intervensaun liu-liu iha Pré-Eskolár Komunitária iha munisípiu sira, ida ne’e rezultadu di’ak tebes hodi hasa’e taxa Kobertura Pré-Eskolár nian, Ministériu Edukasaun apresia tebes hodi kontinua koperasaun ho sira” Tenik Ministra Dulce de Jesus hafoin ekontru.

Durante enkontru, Diretora Fundasaun ALOLA Maria Guteres aprezenta área sira ne’ebé presiza intervensaun no reforsu ba tinan oin, hodi garate kobertura Pré-Eskolar ba labarik sira, antes tama ba ensinu báziku.

“Pré-Eskolár Komunidade neebé estabelese ona no hetan apoiu husi UNICEF (Fundu Nasoes Unidas ba Infánsia) no PHD (Parseria ba Dezenvolvimentu Rekursus Humanu husi Austrália), programa bolsu estudo ba foin sa’e sira no mós biblióteka haleu hodi hadi’a labarik sira nia abilidade lé nian” Fundamenta Diretora Alola.

Parseria entre Fundasaun ALOLA no Ministériu Edukasaun hahu iha 2001 to’o agora no sei kontinua ba oin nafatin hodi garante labarik no foin sa’e sira hotu iha Timor Leste asesu ba edukasaun. (Smnews)