ME no CNC kontinua hametin parseria iha ensinu materia História

Smnewstl.com-Díli, 03/10/2023 – Ministériu Edukasaun Centro Nacional Chega!I.P (CNC) compromete atu kontinua implementa planu asaun anual, bazeia ba nota entendimento ne’ebé assina iha loron 03 fulan Outubru.

Ministra Edukasaun Dulce de Jesus Soares fiar katak, kooperasaun ne’e sei ajuda dezenvolvimentu kuríkulu iha 10 no 20 siklu, tanba exekutivu hahu halo revizaun ba 30 siklu nomós Ensinu Sekundáriu Jerál no Tékniku Vokasionál.

“30 siklu, iha momentu kuandu ha’u sei ministra hahú tiha ona servisu ne’e, maibé servisu ne’e paradu tiha no agora atu kompoin fali ekipa ida atu haree fali matéria ne’e, tanba husik tiha tinan barak no hakarak konvida Chega! atu hola parte iha istória nian hodi bele hakmaan oituan servisu Ministériu Edukasaun nian”, dehan Ministra Edukasaun.

Ba Governante ne’e, istória ne’e la’os konserva de’it iha fatin, maibé tenki lori ba estudante sira, tanba sira mak kontinuadór hodi sai baze hodi harii sira nia sentidu pertense, patriotizmu no nasionalizmu ba rai ne’e.

Diretór Ezekutivu CNC, Sr. Hugo Maria Fernandes argumenta, instituisaun ne’e bele fahe rekursu no enkuadra konteudu relatóriu Chega! nomós “Per Memoriam Ad Spem” iha kuríkulu ensinu.

“Selebrasaun nota entendementu ne’e iha inisiativa tolu (3) mak ida estabelese rede manorin sira nia iha matéria istória, rua mak fó formasaun ba sira inklui mós dezenvolve manuál atu tulun profesór no profesora sira oinsá mak hanorin matéria istória no direitu umanu ho di’ak liu tan”, dehan Diretór Ezekutivu CNC.

Kooperasaun servisu ne’e válida durante tinan 3 nia laran no parte rua sei hamosu grupu tékniku konjunta ne’ebé kompostu husi membru na’in haat (4) hodi tau matan ba implementasaun, monitorizasaun no halo avaliasaun ho periodikamente, pelumenus tinan ida dala ida tuir ezijénsia haruka.(smnews)