ME no CFP Deskuti Problema Professor

Smnewstl.com – Ministra Edukasaun Dulce de Jesus promete Sexta-Feira ne’e, atu rezolve problema ne’ebé professor sira, hodi garante prosesu letivu.

“Enkontru ho Prezidente Komisaun Funsaun Públika ho ekipa atu haree asuntu hat. Ida kona-ba subsídiu transporte ba profesór sira hamutuk 10.228, ingresu espesiál ba professor rihun 5 resin, ba reforma, nomós kargu xefia sira” Tenik Ministra Edukasaun, hafoin hasoru malu ho Prezidente Komissaun Funsaun Públika, Faustino Cardoso Gomes iha Salaun CFP Matadouro.

Kona-ba susbsídiu ba transporte ba professor sira, kada ema ida hetan dólar amerikanu 25 no apoiu ida ne’e atu fasilita professor sira, hodi garante prosesu aprendisajen.

Prezidente Komisaun Funsaun Públika, Faustino Cardoso Gomes fundamenta katak, Ministériu Edukasuan mak halo esklaresimentu ba professor sira, to’o iha nível Postu Administrativu kona-ba direitu, dever sira, rejime karreira no mos informasaun importante seluk.

Faustino Cardoso elojia vontade di’ak husi Oitavu Governu Konstitusionál, hodi rezolve problema iha seitór edukasaun no mos hadi’a kualidade ensinu.

“Ministra Edukasaun hanesan ema ne’ebé koñese di’ak tiha ona situasaun iha terenu, nune’e fasil liu tan hodi komprende situasaun no servisu hamutuk ho CFP, buka rezolve situasaun ne’e liu-liu kestaun kona-ba ingresu espesiál, subsídiu transporte, reforma, subsídiu kona-ba kargu xefia sira nomós dezenvolvimentu kareira profesór sira nian,” Konklui Prezidente CFP. (Smnews)