ME Loke Abertura Formasaun Programa SEA-PLM Ba Koordenador No Koordenadora EBF Husi Munisipiu Hodi Prepara Estudante Sira Ba Avaliasaun Rejional Tinan 2024

Smnewstl. com – Ministra Edukasaun Dulce de Jesus Soares loke abertura formasaun programa Southeast Asia Primary Learning Metrics (SEA-PLM) ba koordenadór no koordenadora Ensinu Báziku Filiál sira husi munisípiu inklui Díli hodi prepara estudante sira klase lima (5) ensinu báziku ba tuir avaliasaun rejionál ne’ebé sei realiza iha fulan outubru tinan 2024. Formasaun ne’e realiza iha salaun City 8, Manleuana, sexta-feira ne’e.

Iha abertura ne’e Ministra Edukasaun Dulce de Jesus hateten, SEA-PLM nia objetivu atu halo avaliasaun ba aprendizajen labarik sira nian liu-liu klase lima (5) ensinu báziku atu haree mós profesór no profesora sira nia hanorin husi pré-eskolár to’o ensinu báziku klase lima (5). Nune’e, husu atu servisu hamutuk ho inan-aman hodi halo preparasaun di’ak ba labarik sira.

“Edukasaun labarik ida nian la’os de’it profesór no profesora sira no la’os mós Ministériu Edukasaun de’it, maibé inan-aman nia papél importante tebes hodi kontrola oan sira labele moras, lablele falta eskola no eziji sira ba eskola, tenki halo TPC hodi prepara sira ba avaliasaun rejionál ne’ebé sei hahú iha fulan outubru tinan 2024”, dehan Ministra Edukasaun.

Governante ne’e hatutan, la’os de’it atu informa kona-ba labarik nia kapasidade literasia no numerasia, maibé mós hanesan dadus ida ba Ministériu Edukasaun atu halo intervensaun ba oin, karik iha indikasaun ruma bele haree fila-fali kuríkulu, formasaun ba profesór no profesora sira, materiál didátiku sira no komponente relevante seluk hodi bele hadi’a prosesu aprendezajen ho di’ak liu tán.

Enkuantu koordenadór no koordenadora ne’ebé partisipa iha formasaun ne’e husi munisípiu hitu (7) mak hanesan, Baucau, Bobonaru, Lautem, Covalima, Ainaru, Ermera inklui Díli.(SMNews)