ME Lansa Programa Protidaun Eskola Hodi Prepara Oan Sira Asesu Ba Eskola

Smnewstl. com – Ministra Edukasaun Dulce de Jesus Soares akompaña husi Diretór Jerál Edukasaun no Ensinu Deolindo da Cruz hamutuk ho autoridade munisípiu Baucau, Diretór Edukasaun munisípiu no fasilitadór/a sira hodi lansa programa Prontidaun Eskola atu prepara oan sira asesu ba eskola, iha salaun INFORDEPE, Munisípiu Baucau.

Iha entrevista Ministra Edukasaun Dulce de Jesus Soares hateten, lansa programa prontidaun eskola hanesan programa kontinuasaun programa eskola iha uma, tuir loloos atu hanesan ho pré-eskolár ida, maibé halo preparasaun ida ba estudante sira ne’ebé mak saidauk iha asesu ba pré-eskolár no ensinu báziku.

“Programa ida ne’e simples atu ajuda ita nia oan sira atu aprende hadér sedu prepara sira nia-an no kontenti ba eskola, sira mós bele aprende literasia no numerasia bázika, nune’e tama iha pré-eskolár no ensinu báziku sira iha ona informasaun no koñesimentu báziku ruma”, dehan Ministra Edukasaun.

Governante ne’e hatutan, programa ida ne’e atu la’o ho di’ak, Ministériu Edukasaun hamutuk ho autoridade munisípiu husu kooperasaun husi lider komunitáriu no inan-aman sira, tanba programa ida ne’e sei hala’o iha komunidade nia leet.

Iha fatin hanesan Diretór Edukasaun Munisípiu Baucau Augusto Hornai Ximenes hateten, hanesan diresaun servisu edukasaun minisípiu Baucau apresia no agradese ba IX governu konstitusionál ne’ebé halo kontinuidade ba programa ne’e nomós halo esforsu hamutuk ho autoridade munisípiu no xefe suku sira hodi bele implementa programa ne’e ho di’ak.

“Programa ne’e sei la’o hahú husi fulan dezembru to’o janeiru antes hahú tinan letivu foun, nune’e ami hanesan munisípiu agradese, tanba programa ida ne’e prepara ami nia oan sira nia literasia no numerasia bázika nune’e bele asesu ba pré-eskolár no ensinu báziku”, dehan Diretór Munisípiu Baucau.

Enkuantu programa ne’e implementa iha postu administratu nen (6) iha munisípiu Baucau, sentru aprendizajen hamutuk 24 no estudante ne’ebé partisipa hamutuk 500 resin, fasilitadór/a hamutuk na’in 48 mak sei tuir formasaun antes destaka ba sentru sira ne’ebé identifika ona.

Hafoin remata lansamentu ne’e entrega mós materiál didátiku sira hanesan, livru, manuál ba fasilidór/a sira, nomós sasan halimar ba labarik sira hodi bele reforsa kapasidade labarik sira nian.

Antes Ministra Edukasaun Dulce de Jesus Soares lansa programa prontidaun eskola, vizita uluk konstrusaun edifísiu foun Edukasaun Munisípiu Baucau nian hafoin hakaat ba INFORDEPE.(SMNews)