ME Inagura Eskola Ensinu Baziku Filial Omelai Iha Postu Administrativu Bobonaro

Smnewstl. com – Ministra Edukasaun, Dulce de Jesus inaugura eskola Ensinu Báziku Filiál Omelai, Aldeia Omelai, Suku Molop, Postu Administrativu Bobonaru, ne’ebé mak apoiu husi Fundasaun “Spend it Well” husi Australia.

“Ita nia parseiru no governu ajuda ita halo eskola, maibé fila-fali ba komunidade edukativa hanesan inan-aman, professor sira, lider komunitária no hotu-hotu tenki tau esforsu hamutuk hodi kuidadu infrastrutura ne’ebé mak iha no husu ba inan-aman atu halo lutu hodi animal sira labele tama”, dehan Ministra Edukasaun.

Governu planeia halo tan eskola 1200 tuir kapasidade orsamental no ajenda ida ne’e prioridade ba Ministeriu Edukasun.

Fundasaun “Spend it Well” Australia halo ona eskola hamutuk sanulu resin hitu (17) iha Timor laran tomak inklui EBF Omelai ne’ebé hamutuk sala aula tolu (3) ba estudante hamutuk na’in 117 inklui fasilidade eskola nian hanesan kadeira, meza, kuadru no seluk tan.

Reprezentante Fundasaun “Spend it Well”, Nandy Gum hateten, atensaun ba seitor edukasaun importante duni, hodi apoiu estudante sira.

Eskola EBF Omelai iha profesór no profesora hamutuk na’in 12 inklui permanente na’in tolu (3), kontratadu na’in (6) no voluntáriu na’in (3) no iha serimónia inagurasaun eskola refere hetan partisipasaun husi Prezidente Autoridade Munisípiu Bobonaru, Prezidente NGO MAHON, Autoridade Lokál nomós komunidade suku Molop tomak.(smnews)