ME Hetan Entervista Husi Jornalista Ki’ik Sira

Smnewstl. com – Ministra Edukasaun Dulce de Jesus Soares hetan entrevista husi jornalista ki’ik sira ne’ebé apoiu husi CARE Internasional hodi husu kona-ba konteudu knaar feto iha lideransa no foti desizaun, dada-lia ne’e hala’o iha Sala reuniaun Ministériu Edukasaun, Vila-Verde, Sexta-feira ne’e.

Iha entervista ne’e Minista Edukasaun Dulce de Jesus Soares espresa sentimentu kontenti hodi simu estudante sira no hatudu katak estudante sira iha duni preparasaun di’ak tebes ho maneira ne’ebé avontade bainhira halo pergunta no domina matéria.

“Ita orgullu, tanba iha estudante timoroan sira ne’ebé mak matenek, ida ne’e mak ita hotu hakarak, labarik timoroan sira hotu matenek, maibé depende de’it oportunidade fó ba sira, nune’e mós depende iha edukadór sira ne’ebé di’ak hamrik iha sira nia kotuk atu bele kontinua fó apoiu ba sira hodi estuda ho di’ak”, dehan Ministra Edukasaun.

Iha oportunidade ne’e mós Ministra Edukasaun Dulce de Jesus Soares fó mensajen ba feto timoroan hotu katak oportunidade iha, maibé depende ba idak-idak priense ho di’ak, nune’e espasu hodi ezerse sira nia direitu hodi priense ukun rasik-an.

Iha fatin hanesan reprezentante husi CARE Internasional iha Timor-Leste Peter CARE nia prioridade iha setór edukasaun mak hamutuk ho labarik no família sira iha área remota liu husi programa sira hanesan projetu Lafaek no programa hatutan nomós suporta iha área kuríkulu, peskiza no programa merenda eskolár.

“Ohin lokraik rona husi Ministra Edukasaun kona-ba lee iha eskola no lee iha uma importante ba CARE katak iha mundu tomak liu-liu Timor-Leste iha oportunidade ba mane no feto, CARE servisu kuaze tinan 30”, dehan reprezentante CARE.

Aleinde ne’e estudante Clarisia Vicenti hateten, kontenti bele dada-lia ho Ministra Edukasaun liuhusi atividade CARE Lafaek.
“Agradese tebe-tebes bele lori ami dada-lia ho Ministra Edukasaun, dala barak ami nunka hasoru Ministra Edukasaun haree husi dook no televizaun, maibé ohin ami hasoru diretamente ho Ministra Edukasaun”, dehan Estudante.(SMNews)