ME gaba dezempeñu professor sira nian

Smnewstl. Com – Ministra Edukasaun Dulce de Jesus agradese dezempeñu professor sira nian, hodi hanorin labarik sira no garante dezenvolvimentu seitór edukasaun.

Apresiasaun ne’e hato’o waihira halo vizita surpeza ba eskola EBC Obratu, EBF Kondar, Pré-Eskolá Iliheu no Pré-Eskolár 8 de Setembro Laclo hodi selebra loron mundiál profesór sira.

Tuir Dulce de Jesus, professor sira kontinua halo esforsu no dedikasaun tomak, hodi dezenvolve seitor edukasaun no iha loron mundial professor sira, lori mos motivasaun ida ba professor sira, ho finalidade ajuda eduka ona povu timor nia oan ne’ebé mak sai futuru ba nasaun ne’e

“Hakarak atu hanorin ba estudante sira atu presiza agradese liuhusi hato’o sira nia domin, hato’o sira nia respeitu ba sira nia profesór no profesora sira atu nune’e bele iha komunikasaun di’ak entre manorin no estudante sira”, dehan Ministra Edukasaun.

Kona-ba prioridade exekutivu nian, Ministériu Edukasaun deklara atu kontinua hadi’a estatutu professor sira, inklui mós hadi’a fasilidade eskola, atu sira mós bele hanorin iha kondisaun ida ne’ebé di’ak liu hodi bele garante oan sira nia prosesu aprendizajen ho di’ak liután.(Smnews)