Smnews.tl com– Ministériu Edukasaun sei aposta iha tinan 2024 melloria ba kualidade ensinu no infraestruturas escolares ne’ebé permite kriasaun sala aula rihun ida ba tinan hirak mai.
Prioridade ne’e anunsia husi Ministra Edukasaun Dulce de Jesus Soares hafoin partisipa iha diskussaun ho Komisaun Revizaun Orsamentu ba Orsamentu Jerál Estadu (OJE) 2024, hodi aprezenta pacote fiskal millaun 109 ba tinan 2024.
Governante ne’e defende aumentu orsamentu ba categoria salariu vensimentu no bens servisu no mos finansia ba iniciativa sira ba pré-eskolár, nivél ensinu hotu, jestaun rekursu umanu, formasaun ba professor/a nomós infrastrutura eskolár.
“Ministériu Edukasaun sei nafatin konstrui eskola tuir nesidade, tanba ne’e iha tinan lima (5) nia laran presiza harii tan sala aula rihun ida (1.000), nune’e, halo fazeadamente no agora iha miloens lima atu halo konstrusaun eskola nomós sei foka ba projetu sira ne’ebé mak sei iha andamentu, maibé Ministériu Edukasaun mós iha tan orsamentu husi doadór sira atu kontinua apoiu konstrusaun ba eskola sira”, Justifika Ministra Edukasaun.
Orsamentu adisionál ne’ebé Ministériu Edukasaun husu atu aumenta tan profesór no profesora hamutuk na’in tolu nulu (30) ba eskola CAFE ne’ebé liuhusi kooperasaun entre governu Timor-Leste no Portugal.
“Iha orsamentu ne’e sei halo rekrutamentu ba profesór no profesora ne’ebé foin gradua husi área edukasaun hamutuk na’in rihun ida (1.000) no dadaun ne’e halo hela levantamentu dadus no iha ona dadus katak presiza duni professor/a sira”, dehan Governante ne’e.
Governante ne’e refere ba lei estatutu kareira dosente katak mínimu abilitasaun ba ema ida atu sai profesór mak baixarelatu, Lisensiatura Mestradu no Doutoramentu, hodi bele kontribu ba melloria kualidade Ensino no mos produz formandu kualifikadu. (Smnews)
Komentariu