ME Anúnsiu Reltadu Ezame Nasionál Ba Ensinu Báziku 9⁰ Ano Nomós 12⁰ Anu Tinan Akadémiku 2023

Smnewstl. com – Ministra Edukasaun Dulce de Jesus Soares hamutuk ho Sekretáriu Estadu Ensinu Sekundáriu Jerál no Ensinu Tékniku Vokasionál Domingos Lopes Lemos fó sai rezultadu ezame nasionál bazeia ba diploma ministeriál nú. 19/2020, 19 maiu kona-ba regulamentu avaliasaun ba 3⁰ siklu ensinu báziku diploma ministeriál nú. 22/2020, 19 janeiru kona-ba regulamentu avaliasaun ba ensinu sekundáriu jerál no dekretu-lei nú. 8/2010 kona-ba aprovasaun planu kuríkulár rejime implementasaun no modelu sertifikasaun organizasaun no avaliasaun ensinu superiór tékniku vokasionál, iha salaun konferénsia Ministériu Edukasaun, Vila-Verde, tersa-feira ne’e.

Iha anúnsiu rezultadu ezame nasionál ne’e Ministra Edukasaun Dulce de Jesus Soares hateten, ezame nasionál hanesan pasu importante iha estudante sira nia moris akadémiku, tanba sai nu’udar instrumentu avaliasaun sumativu ida ba estudante sira ne’ebé atu remata sira nia ensinu báziku iha 9⁰ anu nomós ba sira iha 12⁰ anu.

“Tuir ezame nasionál fó oportunidade ida atu sukat estudante sira nia dezempeñu hodi avalia kualidade ensinu atu fornese informasaun ba planeamentu edukasaun iha futuru no partikularmente ba ensinu sekundáriu atu fasilita triajen ba kandidatu ne’ebé sei asesu ba ensinu superior”, dehan Ministra Edukasaun.

Governante ne’e hatutan, ba tinan akadémiku 2023, hakarak kongratula profesór/a sira hotu ne’ebé ho profesionalizmu tomak hodi eduka, prepara no orienta ona oan doben sira, nune’e bele to’o iha pontu ida ne’e.

“Rezultadu ezame nasionál aponta kata taxa aproveitamentu eskolár liu 80% ba ensinu báziku nomós ba ensinu sekundáriu iha nível nasionál, nune’e konsidera katak husi perspetiva implementasaun orientasaun pedagójika mak eskola balun halo ona servisu di’ak no iha esperansa katak iha tinan sira tuir mai sei tulun estudante sira atu hatudu dezempeñu ne’ebé mak di’ak liu duké tinan ida ne’e”, dehan Ministra Edukasaun.

Governante ne’e akresenta, hanesan hatúr ona iha lei, rezultadu husi ezame nasionál sura hamutuk valór eskola hodi hamosu valór finál ida ne’ebé sei determina alunu sira reprovadu ka aprovadu.

Governante ne’e mós nafatin enkoraja estudante sira ne’ebé la konsege alkansa kompeténsia ne’ebé hatúr iha padraun kuríkulu, maibé husu atu aprende nafatin liuhusi idak-idak nia potensiál ne’ebé extraordináriu hodi bele susesu iha futuru.

Enkuantu rezultadu husi ezame ne’ebé anúnsiu, iha nível ensinu báziku ho númeru estudante ne’ebé rejistu hamutuk 28.696, númeru alunu ne’ebé prezente iha ezame nasionál hamutuk 28.362, númeru ne’ebé auzente iha ezame nasionál hamutuk 334, estudante aprovadu hamutuk 26.922 (94,92%) no reprovadu hamutuk 1440 (5,08%).

Nível Ensinu Sekundáriu Jerál ho númeru estudante ne’ebé rejistu hamutuk 23.064, númeru alunu ne’ebé prezente iha ezame nasionál hamutuk 22.700, númeru ne’ebé auzente iha ezame nasionál hamutuk 364, estudante aprovadu hamutuk 21.380 (94,19%) no reprovadu hamutuk 1320 (5,81%).

Nível Ensinu Sekundáriu Tékniku Vokasionál ho númeru estudante ne’ebé rejistu hamutuk 4.057, númeru alunu ne’ebé prezente iha ezame nasionál hamutuk 3.964, númeru ne’ebé auzente iha ezame nasionál hamutuk 93, estudante aprovadu hamutuk 3964 (100%) no reprovadu 0.

Nível Ensinu Rekorrente ho númeru estudante ne’ebé rejistu hamutuk 401, númeru alunu ne’ebé prezente iha ezame nasionál hamutuk 344, númeru ne’ebé auzente iha ezame nasionál hamutuk 57, estudante aprovadu hamutuk 337 (97,97%) no reprovadu hamutuk na’in 7 (2,03%).(SMNews)