MAUHOKA Ofisialmente Intrega Posto Transito 6 Iha Dili ba Governo

Smnewstl.com 13-10-2021 (Dili)– Empezario Timoroan Salvador do Rego Martins kuinesidu Mauhoka ofisialmente Kuarta-feira ne’e intrega ona Posto Transito 6 (nen) ne’ebe nia parte konstroi ho osan privado ba governo liu husi Primeiro Ministro Taur Matan Ruak.

Serimonia inagurasaun nomos asina plaka husi Xefe Governo ho Emprezario Mahoka, ne’ebe akompanha mos Vice Ministro Interior, Komandante Geral PNTL, Komisario Faustino da Costa, autoridade lokal nomos komunidade halao iha Bairo-Pite Dili.

Komisario Faustino da Costa iha intervensaun agradese ba Empresario Mauhoka, ne’ebe voluntariamente kontribui hodi dezenvolve likus servisu polisia nian ih parte infrasturtura.

“Lori Komando PNTL, hau kongrtula no aradese ba laran luak Mauhoka ho familia tomak ne’ebe kontribui hadia ona Posto Polisia Transito nian iha kapital Dili,”nia sublinha.

Lider masimu PNTL ne’e dehan tan katak, sei garante kontrolu ba posto hirak ne’e atu bele uja ba tempu naruk.

“Ba oin, ita sei hare oinsa bele asegura nune’e bele uja to’o tempu naruk,” nia promete.

Emprezario Timoroan Salvador do Rego Martins kuinesidu Mahoka, sente kontenti bele kontribui hodi konstroi Posto Seguransa ba Polisia.

Nia dehan, apoio ne’ebe fo mai husi fuan ho laran hakarak hare oinsa iha kondisaun ida diak ba Polisia, tamba sira maka garante siguransa vida umana no nasaun.

“Hau oferta ida ne’e, tamba Polisia maka ita nia seguransa. Kalan, ita toba, sira hader hela, entaun tenki iha fatin ida diak ba sira nune’e bele servisu diak liu tan,”dehan Mauhoka

Timoroan laran luak ne’e agradese ba governo liderado Primeiro Ministro Taur Matak Ruak, Vice Ministro Interior, Komandante Geral PNTL, Transito Nacional, Transito Dili nomos entidades hotu ne’ebe konsidera tebes nia apoio ba iha prosesu ida ne’e.

Biban ne’e, Primeiro Ministro Taur Matan Ruak iha intervensaun rekuinese kualidade husi obra refere nune’e agradese espesial tebes ba Mauhoka.

“Ohin ita iha oferta husi na’i veteranus Mahoka ne’ebé hola parte Diretór bá kompañia Rudal ne’ebé fó bá ita postu 6,”

“Fatin ida-ne’e iha tempu liu bá, SEFOPE mak halo konstrusaun, enfelizmente nia durasaun la naruk, aat hotu fali de’it. Ohin ita iha oferta ida-ne’ebé di’ak husi emprezáriu timoroan ida”

“Ha’u husu señór komandante, primeiru okupa 24 oras, ha’u husu Vise-Ministru (Interiór) par tau matan 24 oras lor-loron ema iha ne’e labele husik hela, segundu kuidadu didi’ak, tanba uma hanesan mós ita-nia uma, kuandu ita la hela nia aat, naokten tama, ema bandidu sira tama estraga hotu, entaun presizu ita uza didi’ak, tanba ne’e fatin ita-boot sira-nian hodi serví ita-nia komunidade,”husu Taur

Nia hatutan, hanesan Xefe Governo Preukupasaun governu nian maka redús mortalidade asidente sira iha estrada.

“Tinan-tinan ema mate barak liu fali Covid-19, mate barak liu fali moras sira seluk, tanba asidente sira iha estrada, sé ita kontinua tau matan nafatin para ajuda ita-nia oan sira sa’e motor la’o kuidadu, sira-ne’ebé la’o tuir estrada par ema labele mate, ha’u hanoin ne’e susesu ida bá ita hotu,”tenik Taur.

Posto 6 ne’ebe konstroi kompostu husi 2 iha Bairo Pite, Kolmera 1, Mercado Lama 1, Hotel Timor no Becora.

Posto refere kompleta mos ho fasilidades hanesan AC no Jelera.

Durante prosesu konstrusaun hetan akompanhamentu masimu husi Komandante Polisia Transito Municipio Dili, Inspector Domingos Gama. (Ant)