Marcelino Diskonkorda Governu Ho Parpol Balun Fahe Sasán Bá Vítima Inséndiu Iha Eis Merkadu Komoro

Smnewstl.com (Dili) — Xefe Suku Fatuhada, Marcelino Soares la konkorda governu ho Partidu Polítiku (Parpol) balun ne’ebé fahe sasán uluk bá vítima inséndiu sira iha eis merkadu komoro, sein halo identifikasaun uluk.

Tuir Líder Komunitáriu ne’e katak, bainhira governu atu fahe sasán ruma bá vítima sira, presiza koordena ho autoridade lokál, nune’e bele halo identifikasaun bá vítima sira-ne’ebé merese duni atu apoiu husi estadu, nune’e labele iha manipulasaun bá dadus.

“Ha’u-nia hakarak kuandu akontese ona hanesan ne’e, primeiru ita asegura sira tau iha fatin ida seguru, tama tiha iha fatin seguru depois ita halo rejístu, ita rejístu ne’e uma-ka’in hira konta fali bá fatin ne’e, uma-ka’in 218 ema mós tenki hanesan ne’e, agora iha identifika fatin ne’e la to’o, ema família ne’e liu tiha fali 200 resin, quer dizer iha ne’ebá ema manipula nia aan, tanba nia la’ós hela iha ne’ebá, maibé nia tama dehan ha’u mós vítima,” dehan Xefe Suku, Marcelino Soares, kinta (05/08/21) iha servisu fatin sede suku Fatuhada, Dili.

Nia hatutan, apoiu sira husi governu ne’e nia iha koñesimentu, tanba autoridade lokál mak hato’o relatóriu bá governu sentrál.

Maibé la konkorda governu ho partidu polítiku sira la koopera ho autoridade lokál, bainhira atu fó apoiu bá vítima inséndiu eis merkadu komoro.

“Ha’u iha koñesimentu ha’u mak halo relatóriu ha’u mak bolu sira mai, agora ministériu mai fahe sira-nia sasán hanesan sira mak xefe suku, ha’u la simu ne’e ida-ne’e, lakoi koopera ho xefe suku, ida fali partidu sira mós mai, partidu mai fahe iha fatin ida, governu mai fahe iha fatin ida, entaun husi sira mak xefe suku bá, tanba ne’e mak ha’u la besik iha ne’ebá,” lamenta nia.

Maske la bá iha fatin inséndiu, Marcelino Soares afirma, nia fó orientasaun bá xefe aldeia 01 atu halo servisu tuir orientasaun suku nian, liu-liu asegura uluk vítima sira bá fatin seguru, hafoin bele mobiliza apoiu sira.(ant)