MAPKOMS Submete Ona Proposta Lei Krime Cibernétika ho Radifuzaun Bá PN

Smnewstl.com 03-01-2022 (Dili) — Ministru Assuntu Parlamentar no Komunikasaun Sosiál (MAPKOMS), Francisco Jerónimo hateten, ministériu ne’ebe nia lidera submete ona proposta lei krime Cibernétika ho Radifuzaun bá Parlamentu Nasionál (PN) atu diskuti no aprova iha tinan 2022 ne’e.

Inísiu tinan 2022 ne’e, Ministru MAPKOMS, hala’o enkontru semanal ho Primeiru-Ministru (PM), Taur Matan Ruak, iha rezidénsia ofisiál Farol, Dili.

Ministru MAPKOMS, Francisco Jerónimo informa bá Xefe Governu, Taur Matan Ruak katak, proposta lei ne’ebé submete ona bá PN ne’e, prioridade tebes, tan ne’e sei halo diskusaun ho PN atu bele hetan aprovasaun iha tinan 2022 ne’e.

“Ohin ha’u ko’alia ho Primeiru-Ministru kona-ba lei krime Cibernétika Ciber Crime, ho lei radifuzaun hotu-hotu iha ona Parlamentu, ida-ne’e mós sai ona prioridade ida bá tinan ne’e, atu nune’e tenki hala’o diskusaun makas ho Parlamentu sira par atu bele hetan aprovasaun iha tinan ida-ne’e,” dehan Ministru Francisco Jerónimo, hafoin remata enkontru ho PM Taur iha Rezidénsia Farol, Dili, Segunda ne’e.

Bainhira lei krime Cibernétika ho Radifuzaun ne’e hetan ona aprovasuan iha PN, no promulga ona husi Prezidente Repúblika no tama iha vigór, maka sei regula órgaun komunikasaun sosiál ka jornalista sira hotu nune’e bele sai regulamentu ida-ne’ebé atu bele regulariza ita hotu-hotu iha área komunikasaun sosiál.

Executivo ne’e akresenta, tinan 2022 tama iha tinan polítika, liu-liu iha eleisaun prezidensiál, tan ne’e, apela bá media sira atu oferese porsaun kanál hanesan bá kandidatu sira hodi espressa sira-nia kampaña polítika.

“Pontu de vista ha’u-nian mak ne’e, ha’u husu bá media komunikasaun sosiál sira, atu fó porsaun hanesan bá kandidatu hotu, rádiu televizaun sira fó antena hanesan bá kandidatu sira atu bele espressa sira-nia kampaña, atu nune’e ita bele garante estabilidade liu-liu iha komunikasaun sosiál,” apela nia.

Nia rekuiñse, governu labele interven servisu redasaun media privadu sira, tanba média privadu sira harii ho interese média na’in sira-nian rasik hodi kontribui bá dezenvolvimentu nasionál.

Maibé, iha situasuan no tinan polítika eleisaun prezidensiál no parlamentár ne’e, média sira tenki servisu ho profisionál no labele halis bá kandidatu no partidu polítiku ida, nune’e bele garante estabilidade durante kampaña.(ant)

Kontinua Koopera ho Governu Xína Aselera Instalasaun Sistema DTMB

Sorin seluk, Ministru Assuntu Parlamentar Komunikasaun Sosiál (MAPKOMS), Francisco Jerónimo dehan, kontinua koopera ho governu Xína atu bele aselera prosesu instalasaun bá sistema (DTMB, sígla Inglés) iha Rádiu Televizaun Timor-Leste Empreza Públika (RTTL,ep) nian.

Ministru, Francisco Jerónimo informa, iha dia 1 Janeiru 2022 ne’e, simu novidades furak husi Embaixada Xína iha Timor-Leste, ligadu ho sistema DTMB RTTL nian to’o ona departamentu governu Xína nian ne’ebé responsabiliza kona-ba prosesu ne’e.

“Maibé, kooperasaun la’o di’ak, no ha’u iha dia 1 ha’u hetan informasaun husi parte entidade sira husi Embaixada (Xína) informa bá ha’u katak, prosesu la’o di’ak tebes, oras ne’e tama ona iha governu Xína nian iha Beijing iha departamentu ne’ebé mak halo konta bá atividade sira-ne’e, hein de’it aprovasaun,” informa Ministru, Francisco Jerónimo, hafoin remata enkontru ho PM Taur, iha rezidénsia Farol, Dili, Segunda ne’e.

Governante ne’e relata, parte Timor-Leste nian, finaliza ona dezeñu kona-ba Detail Engineering Design (DED) atu halo prosesu tenderizasaun bá torre RTTL iha Timor laran tomak.

“Bá Governu Timor-Leste tenki prepara torre ona, torre prepara dezeñu DED hotu ona, hein de’it atu halo tenderizasaun oinsá mak prosesu ne’e bele hala’o lalais,” tenik nia.

MAPKOMS mós avalia katak, sistema DTMB ne’ebé antes ne’e lansa iha suku Guiço Postu Administrativu Maubara Munisípiu Likisá no fatin sira seluk ne’e.

Komunidade sira sente duni benefísiu, tanba sira konsege asesu ona bá kanál balun husi Indonézia nian ne’ebé la uza ona parabola Indonézia nian, inklui asesu bá jogu Suziki Cup.

“Avaliasaun husi parte MAPKOMS nian katak, depois de halo avalizasuan halo kontaktu ho ema sira-ne’e, sira dehan di’ak tebes, tanba la presiza uza parabola ona uza de’it ida-ne’e, sira bele hetan ona kanál lubuk ida. Ida mak Suziki Cup ne’e mós sira iha asesu liu-liu iha Dili laran ne’e ho Munisípiu akompaña duni jogu ne’e ho di’ak, tanba RTTL nia fó sai jogu ne’e liu husi kanál DTMB ninian,” informa nia.

Ne’eduni, dadauk ne’e, MAPKOMS koordena ona ho Prezidente RTTL,ep no mós FIFA, nune’e bele fó sai mós jogu kopa mundiál ne’ebé sei akontese iha fulan Novembru 2022 iha kanál RTTL nian liu husi sistema DTMB ne’e rasik.(ant)