Manleuana ho Metinaro Sai Sentru Akollimentu Multifunsaun Temporáriu Bá Vítima Dezastre Naturais

Smnewstl.com 29-09-2021 (Dili) – Governu liu husi reuniaun ordináriu konsellu ministru, deside Manleuana ho Metinaro sai sentru akollimentu bá vítima dezastre naturais iha loron 4 fulan abríl liu bá, no mós hodi hatán bá situasaun emerjénsia sira.

Deside ne’e konsellu ministru foti, hafoin rona tiha aprezentasaun husi Vise Primeiru-Ministru no Ministru Planu Ordenamentu (MPO), José Maria dos Reis ho Ministru Administrasaun Estatal (MAE), Miguel Perreira de Carvalho, kona-ba opsaun ba fatin sira atu implementa sentru akollimentu multifunsaun hodi hatán bá situasaun emerjénsia sira.

Tanba ne’e, Ministru Prezidénsia Konsellu Ministru, Fidélis Leite Magalhães informa, ho aprezentasaun ne’e, konsellu ministru laiha objesaun bá fatin rua ne’e hodi sai sentru akollimentu bá multifunsaun.

“Fatin sira-ne’e mak sei harii hodi bele tau hela fatin bá ita-nia maluk sira-ne’ebé mak vítima dezastre iha 4 de abríl. Haree fatin rua, ida iha Manleuana, ida fali iha Metinaro. Konsellu ministru laiha objesaun bá fatin identifikadu sira,” informa, Ministru Fidélis Magalhães, hafoin remata enkontru iha Palásiu Governu. Kuarta ohin.

Konsellu Ministrus la aprezenta objesaun sira atu kontinua ba prosesu ne’e, tanba fatin Manleuana ho Metinato serve funsaun sentru akollimentu temporáriu ba vítima husi asidente grave no dezastre naturál sira.

“Konsellu ministru husu de’it atu ministru kompetente sira uza sira-nia kompeténsia legál ne’ebé mak iha atu avansa ho prosesu ne’e, atu negoseia par liberta no asegura fatin hirak ne’e par depois bele hahú hala’o servisu iha tempu badak,” afirma nia.

Iha fatin hanesan, Diretór Jerál Protesaun Sivíl, Superintendente Xefe Ismael Babo informa, família uma ka’in 20 resin mak deside hakarak atu fila bá sira-nia munisípiu, tanba sira-nia uma hetan estragus totál husi dezastre naturais iha dia 4 abríl liu bá.

Tanba ne’e Ismael Babo dehan, protesaun sivíl prontu apoiu família hirak ne’e liu-liu hanesan apoiu material konstrusaun uma nian, mã0-de-obra, no mós apoiu kareta hodi tula sira bá munisípiu.

“Dadus temporáriu tama kuaze 20 resin xefe família sira husu liu husi MAE, xefe suku xefe aldeia ho Prezidente Autoridade Dili halo hela koordenasaun ida-ne’e sira konfirma katak, bainhira mak ita-nia maluk sira-ne’e fila, protesaun sivíl prepara kondisoens balun material konstrusaun ita apoiu sira par transporta sira bá,” informa Ismael Babo.

Família uma ka’in 20 resin ne’ebé hakarak fila bá ida-idak nia munisípiu ne’e mai husi sentru akollimentu hanesan, Dom Bosco, Manleuana rate ain, Metinro, maibé, sei hein desizaun husi husi autoridade munisípiu Dili.

Entretantu, Superintendente Xefe Ismael Babo hatutan, konsellu ministru aprova ona rezolusaun governu hodi fó kompeténsia tomak bá Ministériu Administrasaun Estatal ho Sekretáriu Estadu Protesaun Sivíl, atu identifika no halo rekoperasaun bá vítima sira-ne’ebé sira-nia uma hetan estragus totál, tantu sira iha rai rasik no rai ne’ebé mak fó rísku bá sira iha tempu udan.(ant)