Malázia Hakarak Ajuda Xanana Gusmão Hadia Politika Desentralizasaun

Smnewstl.com – Governu Malázia prontu ajuda politika desentralizasaun ne’ebé IX Governu Konstitusionál liderado Kay Rala Xanana Gusmão sei implementa iha Timor-Leste.

“Ha’u halo ona vizita kortezia ho Primeiru-Ministru Xanana, ami diskute kona-ba relasaun nasaun rua nian. Iha oportunidade ne’e ko’alia mós kona-ba aspetu servisu hamutuk iha futúru entre Malázia ho Timor-Leste, Primeiru-Ministru tau atensaun ba importánsia dezentralizasaun iha Timor-Leste no husu Governu Malázia hodi buka meiu fó apoiu hanesan fó formasaun ba funsionáriu sira liu-liu iha aspetu rua importante mak planeamentu no finanseiru nian,”informa Embaixador, Amarjit Sarjit hafoin remata ho Primeiru-Ministru, Kay Rala Xanana Gusmão, iha Palásiu Governu.

Embaixador Amarijit konsidera programa rua ne’ebé IX Governu atu implementa importante hodi hadia jestaun servisu administrasaun no finansas governu nian la’o di’ak liutan.

Hahú kedas iha tinan 2000 too mai agora, Malázia ajuda ona formasaun ba funsionáriu sira iha área The Malaysian Technical Cooperation Program (MTCP).

“Husi kedas tinan 2000 mai ne’e ita fó ona formasaun ba funsionáriu na’in-600 liu ho nia tipu oin-oin liu husi programa The Malaysian Technical Cooperation Program (MTCP), no ita sei oferese programa formasaun ida ne’e ba funsionáriu sira maibé nafatin foku aspetu rua ne’e (administrasaun no finansas),” nia hatete.

Fatin hanesan, Primeiru-Ministru Xanana agradese ba apoiu no husu ba Embaixadór atu bele sai ponte hodi liga governu nasaun rua bazeia ba nesesidade Timor-Leste nian.

Apoia ne’ebé Governu Malazia fó ba Timor-Leste atu ajuda jestaun no finansas Timor-Leste atu hetan governasaun di’ak.(Smnews)