Lu-Olo Hato’o Boas Entrada ba Xanana Gusmao, 15 Janeiro Dekreta Kalendario Eleisaun

Smnewstl.com 07-01-2022 (Dili) – Presidente Republika, Francisco Guterres Lu-Olo hato’o Boas Entrada ba Presidente Partido CNRT, Kay Rala Xanana Gusmao ho estrutura tomak iha tinan foun 2022.

Mensagem Xefe Estado ne’e transmite iha enkontru ho lider partido politiku sira, iha ne’ebe Sexta-feira ne’e kontinua rona opiniaun husi Partido PUDD, KHUNTO no CNRT, hafoin iha Kinta horseik rona Partido PD, PLP, Frente Mudansa no Fretilin.

Vise Presidente Partido CNRT, Tomas do Rosario Cabral akompanhado husi membru Komisaun Politika Nacional, Bendito Freitas, Xefe Bankada CNRT, Duarte Nunes no Vise Xefe Bankada, Patrocino Fernandes informa, enkontru ho Xefe Estado koalia kona ba hanoin husi Partidos Politika sira nian molok dekreta kalendario eleisaun.

Tomas haktuir, dahuluk Presidente Republika hato’o boas entradas ba Kay Rala Xanana Gusmao ho estrutura tomak. Iha biban ne’e, Tomas informa, hanoin husi parte Partido CNRT liderado Kay Rala Xanana Gusmao ba Presidente Republika maka kumprimenta nafatin Konstituisaun RDTL nune’e dekreta kalendario eleisaun hodi hakat ba Eleisaun Presidensial.

Nia hatutan, pozisaun husi Partido CNRT nian antes loron 20 Maio 2022 tenki iha ona Presidente Republika foun nune’e eleisaun tenki akontese tuir kalendario no tenki tenki lao livre, kredibel no susesu.

Kona ba kandidatura husi Partido CNRT rasik ba Presidente, dehan Tomas Cabral, sei deside liu husi konferensia. Eis Vice Ministro Estatal ne’e fundamenta, CNRT hanesan partido politiku ne’ebe maduro nune’e preparado ba eleisaun Presidensial.

Sorin seluk, Presidente Interinu PUDD, Silvestre Sufa Xavier ho ekipa ne’ebe hasoru malu uluk ho Presidente Republika ho asunto ne’ebe hanesan informa, inkontru ho Xefe Estado hodi rona hanoin molok dekreta kalendario eleisaun.

“PUDD hetan konvite husi Prezidente Repúblika mai rona informasaun oinsá bele hala’o preparasaun bá eleisaun, ho nune’e ohin rona tiha ona Prezidente Repúblika no PUDD rasik laiha objesaun seluk, fó apoiu tomak ba hanoin husi Xefe Estado tuir konstituisaun hateten.

Kona ba kandidatura, Silvestre fundamenta, seidauk iha hanoin ba iha neba, tanba sei iha hela prosesu re-organiza partidu no mós estabiliza partidu ho di’ak husi baze. Nia hatutan, kandidatura sei deside liu husi konferensia.

Iha oras ne’ebe la hanesan, Prezidente Partidu KHUNTO, Armanda Berta dos Santos ho ekipa hafoin remata hasoru malu ho Presidente Republika reforsa, kumpre bá konvite hodi koalia kona ba oinsa preparativos partido politikus sira nian hodi dekreta kalendario eleisaun ne’ebe sei deside iha tempu badak.

“KHUNTO preparadu ba Eleisaun Presidensial, maibé data fixu seidauk fó, Prezidente dekreta ona, ita mos prontu atu partisipa. Iha mensagen ne’e, Prezidente Republika mos apresia ho partidu KHUNTO durante ne’e,”dehan atual Vice Primeira Ministra ne’e.

Aliende ne’e, hanesan Partido Politiku ne’ebe enkontru ikus ho Presidente Republika, Sekretáriu Jerál Partidu UDT, Francisco Xavier Carlos informa, Presidente sei dekreta kalendario eleisaun iha loron 14 Janeiro tinan ne’e.

“Enkontru ne’e konsultasaun sobre Prezidente atu dekreta kalendario eleisaun iha dia 15 mai. Ami-nia apresiasaun no louva bá Prezidente Repúblika durante mandatu ne’ebé hala’o servisu embora hasoru dezafius barak, mais hatudu ezemplu hanesan aman ba nasaun,”dehan Francisco.

Nia hatutan, tuir konstituisaun RDTL kada tinan 5 tenki-ser halao eleisaun, ne’e mak konsultasaun ho Presidente Republika no fiar katak, desizaun ne’ebe sei foti hanesan mós UDT hakarak.

“Opiniaun UDT sobre kalendáriu ida-ne’e, UDT nia opiniaun la’ós buat barak, louva Prezidente Repúblika ne’ebé durante 5 anos hala’o nia servisu la’ós fásil hasoru dezafius barak, embora ita iha li’ur ita dehan, buat hotu fásil, mais tama iha sistema hasoru povu nia moris hanesan foin lalais Prezidente hasoru tinan hira liu bá ne’e, ne’e mak UDT louva,”nia tenik tan. (Ant)