Lider Politiku Sai Mensajeiru ba Paz, Eleisaun Lao Hakmatek

Smnewstl.com 31-12-21 (Dili) — Tinan 2022 povu Timor-Leste sei hasoru festa demokrasia liu-liu eleisaun prezidensiál hodi hili Prezidente Repúblika foun atu lidera nasaun ne’e bá periódu tinan 5.

Atu festa demokrasia ou eleisaun prezidensiál la’o hakmatek no susesu, laiha barullu ruma, durante kampaña to’o tomada de posse bá Xefe Estadu foun iha loron 20 fulan Maiu tinan 2022 liu husi rezultadu eleisaun ne’ebé povu mak sei hili direta ne’e fila fali ba lider Politiku sira.

Administradór Parokiál Parókia Katedral Dili, Padre Leandro Maria Alves husu ba líder partidu polítiku sira hotu atu hamutuk ho kosok oan Jesus hodi hametin páz no estabilidade iha ámbitu festa demokrasia iha eleisaun Prezidensiál ne’ebé ne’ebé sei akontese iha tinan 2022. Tuir Padre Leandro, líder sira mak sai hanesan mensajeiru hodi lori páz no estabilidade bá povu.

“Husu bá líder polítiku sira ho kosok oan ne’ebé mak mai, atu sira mak sai hanesan mensajeiru sira mak sai hanesan ida-ne’ebé mak lori páz lori hakmatek no hatudu moris demokrátiku nian bá ita-nia povu sira hotu,” dehan Padre Leandro Maria Alves, iha Igreja Karedral Dili, hafoin remata missa tinan foun, sesta kalan.

Ne’eduni Padre Leandro fi’ar katak, festa demokrasia ne’ebé mak atu mai iha 2022 ne’e, sei haree maturidade povu ninian, atu moris iha nasaun demokrátiku ne’e.

“Hanoin tanba ne’e festa demokrasia, buat ida demokrasia ne’e mak importante, ita buka atu hatudu sai ita-nia espíritu demokrátiku iha ita-nia hahalok sira, ita hatene katak, ita-nia povu atravessa ona festa ida-ne’e la hira ona,” tenik nia.

Maski ne’e Padre Leandro mós observa katak, maioria povu Timor-Leste iha ona maturidade polítika, tanba partisipa beibeik ona eleisaun sira liu bá.

Tan ne’e, povu iha ona esperiénsia, tanba liu esperiénsia iha eleisaun sira liu bá ne’e, hanorin tebes sira, atu bele sai maduru liután.

Entretantu, tuir kalendáriu eleisaun prezidensiál nian, Prezidente Repúblika sei dekreta iha fulan Janeiru nian laran, nune’e bele fó biban bá órgaun eleitorál rua hanesan Komisaun Nasionál Eleisoens (CNE) no Sekretáriu Tékniku Administrasaun Eleitorál (STAE) atu bele hala’o preparasaun bá realizasaun eleisaun ne’e.

Nune’e mós, oras ne’e dadauk, kandidatu bá Prezidente Repúblika ne’ebé hahú harame ona media sosiál mak hanesan, Premiadu Nobel da Páz, José Ramos-Horta, Xefe Estadu Maiór Jenerál F-FDTL, Tenente Jenerál Lere Anan Timur.

Prezidente Partidu KHUNTO, Armanda Berita dos Santos, atuál Prezidente Konsellu Imprensa, Virgílio Guterres ‘Lamukan’, atuál Deputadu PUDD, António Benevides, no atuál Prezidente Repúblika, Francisco Guterres Lú-olo.(ant)