Lere : Segunda Submete Lista ba Tribunal Recursu no Foti Kartaun Militante FRETILIN Iha CCF

Smnewstl.com 29-01-2022 (Dili) — Tuir oráriu ne’ebé prepara husi ekipa susesu bá kandidatura Prezidente Repúblika, Lere Anan Timur komfirma katak, Segunda-feira loron 31 Janeiru 2022, sei lori lista kandidatura Lere bá rejísta iha Tribunál Rekursu no iha parte lokraik iha oras tuku 3, ho apoiante konsentra iha Sekretariadu iha Pantai-kelapa hafoin iha tuku 4 lokraik kontinua kedas ba Komite Sentrál FRETILIN (CCF) hodi foti kartaun militante partidu FRETILIN.

“Tuir enkontru husi ekipa susesu ne’ebé realiza hodi kalan katak, data tentativa mak entre dia 31 no dia 1 fevereiru, iha ne’e daduak rejístu ona 20 mill, maibé tuir kritériu ne’ebé iha katak, ami sei lori 5 mill ne’ebé prepara hodi bele bá rejístu,” dehan Terseiru Vise Koordenadora, Sandra Tilman, iha Sekretariadu Kandidatura PR, Lere Anan Timur iha Pantai-kelapa, Dili, sábdu ne’e.

Sandra Tilman hatutan, kandidatura Tenente Jenerál reformadu, Lere Anan Timur la la’o mesak, maibé sei hetan apoiu másimu husi nia kamarada no kompañeiru sira ne’ebé uluk sira hamutuk iha tempu funu iha ai laran.

Entretantu, Sandra Tilman hatutan, iha loron Segunda-feira semana-oin mós, Tenente Jenerál reformadu Lere Anan Timur sei bá foti ninia kartaun militante FRETILIN iha CCF.

“Hanesan ohin data ne’ebé termina ona katak, bainhira bá foti kartaun militante iha CCF, kartaun militante nu’udar ema FRETILIN ida mós, data fixu mak 31 Janeiru oras tuku 3 konsentra iha sede Kandidatura Jenerál Lere nian depois ho massa sei tun bá iha CCF,” dehan Sandra Tilman.

Sorin seluk, Reprezentante husi organizasaun Santu Antonio prefere, Sekretariadu apoiu Kandidatura, atu organiza komferénsia extra-ordináriu ida hodi deside molok lori Tenente Jenerál reformadu Lere Anan Timur bá nia uma antigu partidu FRETILIN.

Tanba tuir sira , presiza halo komferénsia extra-ordináriu ligado ho líder polítiku balun ne’ebe so’e liafuan tuir sira-nia interpretasaun ne’ebe halo sira la konfortável.

Entretantu, Prezidente Repúblika, Francisco Guterres Lú-olo, ezonera Xefe Estadu Maiór Jenerál F-FDTL, Tenente Jenerál Lere Anan Timur husi nia kargu iha loron 28 fulan Janeiru 2022, hafoin simu proposta husi governu no mós rona hanoin husi Konsellu Superiór Defeza no Seguransa.(ant)