Lere Pronto Avansa ba PR, Lakoi Xanana Tula Liman ba Kandidatu Laos Mai Husi Ailaran

Smnewstl.com 24-11-2021 (Dili) – Xefe Estadu Maiór Jenerál Falintil Forsa Defeza Timor-Leste (F-FDTL), Tenente Jenerál Lere Anan Timur deklara, prontu kandidata a’an bá Prezidente Repúblika, maibé tenki liu husi partidu FRETILIN no hetan apoiu mós husi Eis Komandante Eim-Xefe das FALINTIL, Kay Rala Xanana Gusmão.

“Hau aseita, kandidatu ha’u-nia aan ba Presidente Repúblika liu husi Fretilin, depois bele apoiu husi partidu sira seluk, partidu sira seluk. Ha’u fiar katak partido rua ou tolu bele apoio hau. Mais ha’u-nia maun Xanana maka atu tula fali ba ema seluk, hanesan tula ba Falur ga, Tula ba Aluc ga, tula ba Maunana ne’e ha’u konkorda,”afirma Tenente Jenerál, Lere Anan Timur hafoin remata enkontru ho Xefe Estadu iha Palásiu Prezidensiál Aitarak-laran, Dili, Kuarta-feira ne’e.

Lere fundamenta, iha kuadru partidu FRETILIN balun husu ona nia atu kandidata bá Prezidente Repúblika, maibé, seidauk iha desizaun husi Komité Sentrál FRETILIN rasik.

“Maluk balun FRETILIN ninian, hakarak kandidata ha’u ba Prezidenti, hanoin katak hau prontu, ha’u prontu, ha’u prontu, tanba ha’u hanesan dehan ona katak, ha’u husi FRETILIN, mais ha’u aseita, sé FRETILIN aseita, mais to’o tempu ne’ebé dehan katak FRETILIN hakarak sem dúvida,” dehan Lere.

“Mais hau atu kandidata hau sei husu hau nia maun Xanana, tanba hau nia Komadante Superior, aseita hau kandidata, mais dehan lalika, kestaun konsederasaun,” dehan Lere.

Maski ne’e, Lere rekuinese, dadauk ne’e seidauk bele deklara atu kandidata aan bá Prezidente Repúblika, tanba asume hela funsaun no missaun hanesan Komandante Forsa Armanda nian.

“Mais agora hau hanoin seidauk to’o iha ne’e, maibe hau hanoin hau nia misaun, hau nia knar nudar komadante xefe estadu maior Jeneral forsa armada ninian.”tenik nia.

Tenente General ne’e deklara, FRETILIN ne’e iha ona fuan nu’udar lulik ida labele halauha, tanba segundu jerasaun FRETILIN mak nia mesak de’it ona.

Maibé nia prefere figura ne’ebé Xanana Gusmão fó apoiu bá Prezidente Repúblika tenki mai husi ema ailaran nian, lakoi atu kandidata ema seluk.(ant)